Siarhiej Michałok 25 sakavika budzie hrać u Mazyry z prajektam «Lapis-98» i nie zmoža vystupić na minskim kancercie la Opiernaha teatra, pryśviečanym 100-hodździu abviaščeńnia niezaležnaści BNR, piša Radyjo Svaboda.
Pra heta Svabodzie paviedamiŭ Anton Aziźbiekian, arhanizatar kancertaŭ prajektaŭ Siarhieja Michałka. Sam Michałok praciahły čas nie vychodzić na suviaź. Ciapier niama nieabchodnaści, kab kancerty kamientavaŭ sam Michałok, kaža Aziźbiekian, a kali «budzie nahoda», to ŭ hurtoŭ Michałka «jość svaje kanały dla infarmavańnia».
Kancert u Mazyry zapłanavany ŭžo daŭno, tłumačyć Aziźbiekian, i nijakich źmienaŭ u hrafiku ŭžo niemahčymyja. Tym bolš, jak jon kaža, kancert — heta nie prosta «pryjechać, vyjści na scenu i adśpiavać». Vystup rychtujecca za niekalki dzion, treba pryvieźci aparaturu, jaje naładzić i pravieryć.
Arhanizatary kancerta raniej publična źviarnulisia da Michałka, bo tydzień nie mahli ź im źviazacca, prapanoŭvali arhanizavać hurtu transpart da Mienska i ź Mienska. Siarod pryčynaŭ vystupić u Miensku 25 sakavika arhanizatary kancertu nazyvali pieśni hurtoŭ Michałka kštałtu «Hraj», «Nie być skotam», «Budź śmiełym», «Rodny kraj», «Belarus Freedom»), jakija «stali nie prosta chitami, a sapraŭdnymi himnami novaj Biełarusi». Usie hetyja pieśni vykonvali abo «Lapis Trubiacki», abo Brutto, ale jany nie ŭvachodziać u repertuar prajektu «Lapis-98», ź jakim Michałok vystupić u Mazyry.
Arhanizatary napisali adkryty list da Siarhieja Michałka z zaklikam vystupić kala Opiery ŭ Minsku 25 sakavika
