Hałoŭnaje ŭpraŭleńnie ideałahičnaj raboty, kultury i ŭ spravach moładzi Hrodzienskaha abłvykankama razasłała listy va ŭsie rajonnyja muziei z rekamendacyjaj pravieści tvorčyja mierapryjemstvy da 100-hodździa abviaščeńnia niezaležnaści BNR 25 sakavika, piša «Radyjo Svaboda».
Toje, što takija listy ź ideałahičnaha adździełu atrymanyja, Svabodzie paćvierdzili adrazu ŭ niekalkich muziejach. Dyrektarka Vaŭkavyskaha vajenna-histaryčnaha muzieja Ała Sujata skazała, što jany nia mohuć zrabić kankretnuju ekspazycyju da 25 sakavika, pakolki nie majuć dla hetaha adpaviednych ekspanataŭ.
«Ale lekcyju pra historyju BNR z multymiedyjnymi materyjałami 25 sakavika my źbirajemsia pravieści», — zapeŭniła dyrektarka muzieju.
U Navahradzkim historyka-krajaznaŭčym muziei 25 sakavika sumiesna ź miascovaj supołkaj TBM źbirajucca zładzić litaraturnuju viečarynu, pryśviečanuju 100-hodździu BNR.
«Płanujem, što, akramia histaryčnaj lekcyi, u nas buduć hučać vieršy, pryśviečanyja BNR, a taksama pieśni», — skazała Svabodzie staršaja navukovaja supracoŭnica muzieju Halina Kavalčuk.
U Ašmianskim muzei dyrektarka Nastaśsia Navickaja patłumačyła, što list z abłvykankama nakont śviatkavańnia 25 sakavika jany atrymali, ale ŭ miežach hadavoha płana rajonnaja biblijateka ŭžo padrychtavała vystavu knih: «Biełaruskaja Narodnaja Respublika ŭ kantekście historyi biełaruskaj dziaržaŭnaści».
U Lidzkim historyka-mastackim muzei imprezy da 25 sakavika ładziać sumiesna ź siabrami TBM. Stanisłaŭ Sudnik, siabra Tavarystva biełaruskaj movy, skazaŭ Svabodzie, što pieršapačatkova hramadzkija aktyvisty płanavali adznačyć u Lidzie 100-hodździe BNR 22 sakavika, kab 25-ha naviedać śviata ŭ Minsku.
«Kali ja pajšoŭ da miascovych uładaŭ z prośbaj dać dla hetaha pamiaškańnie, to mnie adkazali, što 100-hodździe BNR u Lidzie budzie adznačacca 25 sakavika i pravodziać jaho miascovyja orhany ŭłady. Ja, zrazumieła, byŭ pryjemna ździŭleny, bo skazali, što navat i symbolika BNR budzie prysutničać», — raspaviadaje Sudnik.
Śviatočnyja padziei da 100-hodździa BNR rychtujucca i ŭ Hrodnie. Inicyjatarami vystupili pradstaŭniki apazycyjnych partyj, ułady abiacali im spryjać padrychtoŭcy ŭračystych imprezaŭ.
