Ihar Mielnikaŭ raspačaŭ zbor srodkaŭ na vydańnie ŭnikalnaj knihi «Zabyty korpus. Historyja polskaha vojska na Babrujščynie ŭ 1918, 1919 — 1920 hadach», pryśviečanaj historyi znachodžańnia častak Pieršaha polskaha korpusa, a potym i Vialikapolskaj dyvizii na terytoryi Babrujščyny ŭ akreśleny pieryjad.
Padtrymać hety cikavy prajekt, možna na sajcie talaka.org. Zbor praciahvajecca da pačatku krasavika 2018 hoda. Novaja kniha biełaruskaha historyka Ihara Mielnikava — heta bolš za 200 staronak unikalnych faktaŭ vajskovaj historyi Biełarusi i Polščy, a taksama kala 300 archiŭnych i sučasnych zdymkaŭ, bolšaść ź jakich publikujucca ŭ Biełarusi ŭpieršyniu.
Hałoŭnaja meta hetaha vydańnia — raspavieści čytačam historyju stvareńnia i dziejnaści Pieršaha polskaha korpusa na terytoryi Biełarusi, apisać tyja fakty, pra jakija raniej nie ŭzhadvali ajčynnyja daśledčyki i navukoŭcy. Pieryjad, kali hetaja vajskovaja farmacyja znachodziłasia na terytoryi našaj krainy, adzin z klučavych u biełaruskaj historyi. Mienavita ŭ sakaviku 1918 hoda była abvieščanaja niezaležnaść Biełaruskaj Narodnaj Respubliki — dziaržavy, bieź jakoj nie było b stvorana savieckaja Biełaruś. BNR stała pieršaj u XX stahodździ sprobaj biełarusaŭ zajavić pra žadańnie žyć u niezaležnaj dziaržavie. Fakt jaje stvareńnia zakłaŭ padmurak, na jakim užo ŭ kancy XX stahodździa paŭstała niezaležnaja Respublika Biełaruś. Jakuju palityku abrała kamandavańnie Pieršaha polskaha korpusa ŭ dačynieńni da biełarusaŭ i ich krainy? Za što zmahalisia polskija lehijaniery ŭ 1918 hodzie? Jak aceńvali polskija kamandziry vartaść Babrujskaj krepaści? Jak BNR staviłasia da vojska Doŭbar-Muśnickaha? Na hetyja i inšyja pytańni vy znojdziecie adkazy ŭ knizie «Zabyty korpus».
Padziei polska-balšavickaj vajny na Babrujščynie — heta taksama małavyvučany aśpiekt biełaruskaj historyi. U novym vydańni aŭtar pasprabavaŭ abahulnić viadomyja fakty, a taksama znajšoŭ i apracavaŭ značnuju kolkaść novych dakumientaŭ, materyjałaŭ i ŭspaminaŭ, jakija dapamahajuć zrazumieć tyja padziei mienavita ź biełaruskaha punktu hledžańnia.
Varta padkreślić, što Ihar Mielnikaŭ pryśviaciŭ svaju novuju knihu 100-hadovamu jubileju Biełaruskaj Narodnaj Respubliki, a taksama rodnamu dla jaho Babrujsku.
