U spravie ab arhiencinskim narkatrafiku źjaviłasia imia staršyni Rady Fiederacyi Valanciny Maćvijenka. Biznesmen Andrej Kavalčuk, jakoha ličać haspadarom bujnoj partyi kakainu, patrabujučy pierasłać bahaž praz dyppoštu, zajaviŭ, što častka «rečaŭ» z čamadana naležyć mienavita Maćvijenka. Pra heta havorycca ŭ pakazańniach hałoŭnaha śviedki abvinavačańnia — supracoŭnika pasolstva Rasii ŭ Arhiencinie Ihara Rohava.
Rohaŭ pracuje ŭ pasolstvie zahadčykam haspadarki z vosieni 2016 hoda. Mienavita jon, pravodziačy ahlad škoły ŭ listapadzie 2016 hoda, znajšoŭ čamadany z kakainam. Bahaž, pavodle materyjałaŭ spravy, naležaŭ Kavalčuku. Pakinuć čamadanaŭ u pasolstvie jamu dazvoliŭ były zahadčyk haspadarki — Ali Abianaŭ. Ciapier jon taksama aryštavany i źjaŭlajecca fihurantam spravy.
«U adnoj z hutarak, nakolki pamiataju, u lipieni 2017 hoda, Kavalčuk spytaŭ: «Jak tam maje valizki?» — havorycca ŭ pakazańniach Rohava. — Heta byŭ pieršy raz paśla listapada 2016 hoda, kali jon zahavaryŭ pra heta, vidavočna, miarkujučy, što ja pavinien viedać pra ich ad Abianava. Ja zrabiŭ vyhlad, što ździviŭsia, tak jak Abianaŭ kazaŭ mnie pra skrynki, a nie pra valizki i spraŭdziŭ u Kavalčuka: «Tam usio-taki valizki, a nie skrynki?» Na heta jon mnie adkazaŭ, što tak, na samaj spravie tam valizki, u jakich jaho rečy, rečy Abianava i navat «rečy Maćvijenka», majučy na ŭvazie vidavočna staršyniu Savieta Fiederacyi Maćvijenka V.I.».
