Fota: Egypt Ministry of Antiquities
Jehipieckija archieołahi vyjavili ruiny hreka-rymskaha chrama ŭ Livijskaj pustyni, prykładna za 300 kiłamietraŭ na poŭdzień ad uźbiarežža Mižziemnaha mora. Śpiecyjalisty znajšli piaredniuju častku budynka, uvachod, častku piaredniaha dvara i reštki padmurka. Pra heta paviedamlaje vydańnie Science Alert.
U chodzie raskopak byli znojdzieny staražytnyja artefakty: kieramičnyja pasudziny, maniety, abłomki skulptury, vapnavyja statui lvoŭ i słupy. Architekturnyja elemienty akazalisia ŭpryhožanymi malunkami i bareljefami z hreka-rymskimi matyvami, u pryvatnaści, ionikami — arnamientami ź jajcapadobnymi formami, padzielenymi «strełkami». Sam chram datujecca pramiežkam ad 200 hoda da našaj ery da 300 hoda našaj ery.
Na dumku navukoŭcaŭ, adkryćcio dazvolić bolš daznacca pra raźvićcio kultury ŭ aazisie Siva, jaki raźmiaščajecca za 50 kiłamietraŭ ad miesca raskopak i za 560 kiłamietraŭ ad Kaira. Aazis ŭjaŭlaje saboj izalavanaje čałaviečaje pasielišča, u jakim siońnia pražyvaje 23 tysiačy čałaviek. Ličycca, što ludzi žyvuć tut užo 12 tysiač hadoŭ, adnak pieršyja zhadki adnosiacca da časoŭ praŭleńnia Treciaha pierachodnaha pieryjadu ŭ historyi Jehipta (1075—656 hady da našaj ery).
Pakolki chramy zvyčajna stanavilisia centrami pasieliščaŭ, archieołahi ličać, što dalejšyja raskopki dazvolać znajści damy śviataroŭ i vyśvietlić, čamu chram pabudavany ŭ hreka-rymskim styli. U časy elinistyčnaj i rymskaj kultur ludzi zvyčajna budavali chramy, tradycyjnyja dla Staražytnaha Jehipta.
