Zasnavalnik Facebook Mark Cukierbierh pradstaviŭ kamitetu pałaty pradstaŭnikoŭ ZŠA pa enierhietycy i handli svaje pakazańni pa pytańni vykarystańnia infarmacyi karystalnikaŭ. 11 krasavika Cukierbierh paŭstanie pierad kamitetam asabista.
«My zrabili niedastatkovaha dla taho, kab praduchilić vykarystańnie funkcyjanału sacyjalnaj sietki na škodu, — havorycca ŭ pakazańniach Cukierbierha, apublikavanych na sajcie kamiteta. — Havorka idzie pra fejkavyja naviny, zamiežnaje ŭmiašańnie ŭ vybary, raspalvańnie nianaviści i abaronu infarmacyi». Jon adznačyŭ, što heta była jaho pamyłka, za jakuju jon prynosić prabačeńni.
«My byli zanadta marudnyja dla taho, kab zaŭvažyć rasijskaje ŭmiašańnie i adkazać na jaho. My staranna pracujem, kab stać lepš», — napisaŭ zasnavalnik Facebook. Pavodle jaho słoŭ, sacyjalnaja sietka praciahvaje pracavać z uradam ZŠA, dla taho kab u poŭnaj miery zrazumieć stupień rasijskaha ŭmiašańnia. «My pastarajemsia zrabić zaležnaje ad nas nie tolki dla zachavańnia cełasnaści vybaraŭ pa ŭsim śviecie, ale i dla taho, kab dać ludziam mahčymaść vykazvacca i być siłaj dla demakratyi pa ŭsim śviecie», — skazaŭ na zakančeńnie Cukierbierh.
Ciapier Facebook dazvolić dadatkam atrymlivać dostup tolki da imia, fatahrafii karystalnika i jaho elektronnaj pošty, a taksama abaviaža kampanii padpisvać kantrakty z sacyjalnaj sietkaj dla taho, kab źbirać takija dadzienyja. Akramia taho, Facebook praviadzie pravierku ŭsich dadatkaŭ, jakija atrymlivali dostup da dadzienych karystalnikaŭ da 2014 hoda.
Kali Cukierbierh kazaŭ pra rasijskaje ŭmiašańnie, jon pradastaviŭ ŭžo viadomuju infarmacyju. Pa dadzienych Facebook, rasijskaje Ahienctva internet-daśledavańniaŭ viało dezinfarmacyjnuju kampaniju z vykarystańniem fejkavych akaŭntaŭ.
