Namieśnik staršyni Homielskaj abłasnoj arhanizacyi Abjadnanaj hramadzianskaj partyi Uładzimir Kacora źviarnuŭsia ŭ Kanstytucyjny sud z patrabavańniem vykanać rašeńnie Kamiteta AAN pa pravach čałavieka ab adnaŭleńni dziejnaści hramadskaha abjadnańnia «Hramadzianskija inicyjatyvy».
U červieni 2003 hoda Homielski abłasny sud pa isku ŭpraŭleńnia justycyi vynies rašeńnie ab likvidacyi HA «Hramadzianskija inicyjatyvy», adnym z zasnavalnikaŭ jakoha źjaŭlaŭsia U.Kacora. Paśla taho jak byli vyčarpany ŭsie ŭnutrydziaržaŭnyja sposaby pravavoj abarony, staršynia hramadskaha abjadnańnia Viktar Karniajenka źviarnuŭsia ŭ Kamitet AAN pa pravach čałavieka. U kastryčniku 2006 hoda kamitet pryznaŭ, što HA «Hramadzianskija inicyjatyvy» padlahajuć adnaŭleńniu na praciahu 90 dzion paśla pryniaćcia zhadanych mierkavańniaŭ ab parušeńni z boku Respubliki Biełaruś prava na svabodu asacyjacyj.
«Šmatrazovyja zvaroty pa pytańni vykanańnia ŭzvažvańniaŭ kamiteta AAN u kampietentnyja dziaržaŭnyja orhany Biełarusi byli biespaśpiachovymi, bo ŭ našaj krainie adsutničajuć jurydyčnyja miechanizmy, skiravanyja na realizacyju hramadzianami prava, što zamacavana artykułam 61 Kanstytucyi», — havorycca ŭ zvarocie ŭ Kanstytucyjny sud. U suviazi z hetym U. Kacora prosić KS pryniać miery dla realizacyi hramadzianami svaich pravoŭ. Anałahičnyja zvaroty nakiravany ŭ MZS i Ministerstva justycyi.
Amal adnačasna Kacora źviarnuŭsia da načalnika UKDB pa Homielskaj vobłaści z prośbaj viarnuć jamu ryzohraf, skanfiskavany 14 śniežnia 2007 hodaŭ pryvatnym domie ŭ vioscy Čkałava Homielskaha rajona, što naležyć baćkam člena AHP Zinaidy Šumilinaj. Kanfiskacyju techniki supracoŭniki KDB patłumačyli praviadzieńniem apieratyŭna‑vyšukovych dziejańniaŭ u ramkach raspačataj kryminalnaj spravy ŭ adnosinach da členaŭ arhanizacyi «Małady front».
