Ministerstva kultury i spadčyny Polščy pasprabuje spynić razbureńnie Staroha zamka ŭ Hrodnie i ci płanuje ŭ hetaj spravie źviartacca da ŭładaŭ Biełarusi? Takija pytańni nakiravaŭ ministru kultury Piatru Hlińskamu deputat Sojmu Robiert Tyškievič.
Robiert Tyškievič — deputat ad apazicyjnaj partyi Hramadzianskaja płatforma (PO), kiraŭnik parłamienckaj hrupy ŭ spravach Biełarusi, daŭno zajmajecca biełaruskim kirunkam u palitycy Polščy. Jon dasłaŭ svoj zapyt u Ministerstva jašče ŭ siaredzinie lutaha. Adkaz pryjšoŭ praź miesiac.
Polskija ekśpierty pryjeduć u Biełaruś?
Deputata i ministra chvalujuć intensiŭnyja budaŭničyja pracy na terytoryi zamka z vykarystańniem ciažkaj techniki. Ich taksama chvaluje toje, što «aŭtentyčnaść zamka addadziena ŭ achviaru ambicyjam aŭtara prajekta rekanstrukcyi Uładzimira Bačkova».
Ministr Piotr Hliński adznačaje, što biełaruski bok nie infarmavaŭ palakaŭ pra pačatak prac. Tamu ministerstva paabiacała parłamientaryjam, što ŭ miežach svaich mahčymaściaŭ budzie staracca atrymać infarmacyju pra płany budaŭnikoŭ, a taksama budzie namahacca, kab polskija ekśpierty jak maha chutčej zmahli acanić asabista abjom prac na terytoryi zamku.
Šlachoŭ upłyvu mała i jany nie efiektyŭnyja
Ministr udakładniŭ, što asnoŭnym dy adzinym farmalnym miescam dyjałohu pa spravach spadčyny źjaŭlajecca Polska-Biełaruskaja Kansultacyjnaja Kamisija, ale jana nie maje asablivych kampietencyj i moža tolki davać parady. Ministr paabiacaŭ, što temu Staroha zamku abaviazkova ŭklučać u paviestku čarhovaha pasiadžeńnia Kamisii ŭ 2018 hodzie.
Ministr taksama źviarnuŭ uvahu, što ŭ Biełarusi pytańni spadčyny mohuć być palityčna matyvavanyja, tamu mierkavańnie zamiežnych śpiecyjalistaŭ, navat vysokaha kłasu, moža być u vyniku i tak praihnaravana.
Maštabnyja raboty na terytoryi zamka pačalisia vosieńniu 2017 hoda. Za asnovu rekanstrukcyi ŭziaty zamak časoŭ karala Stefana Batoryja. Eskizny prajekt raspracavaŭ minski architektar Uładzimir Bačkoŭ, jaki ŭ 80-90-ja hady minułaha stahodździa ŭžo zajmaŭsia pieradprajektnymi daśledavańniami. Padčas rekanstrukcyi hałoŭnym architektaram prajekta staŭ Aleh Šymbarecki z «Hrodnahramadzianprajekta».
Zaraz idzie pieršaja čarha rekanstrukcyi. Jaje zavieršać nie raniej 2020 hoda. Spačatku rekanstrujujuć bramu, halereju pamiž imi i pałacam, a taksama viežu. Druhaja čarha — restaŭracyja pałaca, treciaja — ścieny nad Niomanam i ŭnutrany dvor. U vyniku zamak pavinien vyhladać tak, jak u časy Stefana Batoryja.
Prajekt Bačkova ŭsprymajecca nieadnaznačna, niekatoryja daśledčyki nazyvajuć jaho fantazijnym i škodnym.
