Kala stancyi mietro «Maładziožnaja» płanujuć pabudavać basiejn mižnarodnaha standartu. Prajekt častkova prafinansuje Kitaj. Ale dla hetaha treba źnieści budynak drukarni «Čyrvonaja zorka», paviedamlaje TUT.BY.
U lipieni 2017 hoda stała viadoma, što Kitaj moža dać hrošaj na budaŭnictva nacyjanalnaha futbolnaha stadyjona i basiejna mižnarodnaha standartu ŭ Minsku. Tady havorka išła pra sumu ŭ 180 miljonaŭ dalaraŭ.
Dalej u inviestprahramie Minska na 2018 hod źjaviŭsia artykuł vydatkaŭ na budaŭnictva basiejna mižnarodnaha standartu ŭ rajonie Kalvaryjskaj. Užo ŭ hetym hodzie na padrychtoŭku terytoryi i prajekta vydzielać 10 miljonaŭ rubloŭ ź biudžetu.
Jak paviedamili TUT.BY rabotniki drukarni «Čyrvonaja zorka», jakaja padparadkoŭvajecca Ministerstvu infarmacyi, basiejn źbirajucca budavać na miescy ich pradpryjemstvy ŭ pieršym Zaharadnym zavułku, 3. Dla hetaha treba znosić budynak i pierasialać drukarniu ŭ inšaje miesca.
Skrynšot z karty «Jandeks»
Hetuju infarmacyju paćvierdzili i surazmoŭcy partała ŭ dziaržaŭnych orhanach. Praŭda, pa ich słovach, prezident pakul nie padpisaŭ adpaviedny ŭkaz.
— Nakolki ja viedaju, tam było niekalki redakcyj [ukaza], ale pakul jon nie padpisany, — kaža infarmavanaja krynica.
Pa słovach inšaha surazmoŭcy ŭ dziaržorhanach, pracaŭniki «Čyrvonaj zorki» zaniepakoilisia svajoj budučyniaj i pisali listy ŭ roznyja instancyi.
Pa słovach supracoŭnikaŭ, «Čyrvonuju zorku» rearhanizujuć i dałučajuć da Palihrafkambinata imia Jakuba Kołasa, jaki taksama naležyć Mininfarmu. Rabotnikam prapanujuć pracaŭładkavańnie tam ža. Adny pahadžajucca, druhija — nie. Hałoŭnaja pryčyna zaklučajecca ŭ raźmiaščeńni Palihrafkambinata — na Karžanieŭskaha.
Jak vynikaje z adkazu Ministerstva infarmacyi na kalektyŭny zvarot rabotnikaŭ «Čyrvonaj zorki», budaŭnictva basiejna zapłanavana mienavita tut pa rašeńni kitajskaha boku. Zhodna z prajektam ukaza prezidenta, «Čyrvonuju zorku» treba adsialić z Zaharadnaha zavułka da 1 červienia.
