Jašče adzin sudovy praces nad starasłužačymi idzie ŭ sudzie Hrodzienskaha rajona.
Na łavie padsudnych dvoje chłopcaŭ: siaržant Uładzisłaŭ Jalec i jafrejtar Maksim Małyška z 6-j asobnaj miechanizavanaj bryhady, jakaja mieścicca ŭ Hrodnie. Chłopcam pahražaje ad 3 da 10 hadoŭ pazbaŭleńnia voli.
Maksim Małyška (źleva). Fota z sacyjalnych sietak
Farmuloŭka standartnaja — 20-hadovaha siaržanta Jalca vinavaciać u pieravyšeńni słužbovych paŭnamoctvaŭ z užyvańniem hvałtu, 24-hadovy Małyška prachodzić jak pasobnik. Śledstva miarkuje, što jašče ŭletku 2017 hoda na palavym vychadzie jany ŭdvuch źbili piaciarych sałdat — nibyta pakarali za toje, što ŭ vajskovym namiocie nočču zhasła buržujka.
Hetaja sprava, jak i sprava siaržanta, jakoha sudziać u Barysavie, zakruciłasia ŭ listapadzie 2017 hoda. Heta čarhovy vynik šmatlikich pravierak, jakija prajšli ŭ vojsku paśla śmierci radavoha Alaksandra Koržyča ŭ Piačach.
Jalec i Małyška znachodziacca na voli, praciahvajuć słužbu. Ich tolki pieraviali ŭ inšuju častku. Abodva chłopcy słužać z vosieni 2016 hoda. Da dembiela im zastajecca mienš za miesiac. Praŭda, pakul nieviadoma, kudy pajeduć siaržant i jafrejtar: dachaty ci ŭ kałoniju.
«Naša Niva» źviazałasia z adnym abvinavačanym, Maksimam Małyškam, i daviedałasia jaho punkt hledžańnia na situacyju.
«Ja admaŭlajusia davać pakazańni na sudzie. Vinu taksama nie pryznaju. Jana nie dakazanaja, i nieviadoma, ci dakažuć jaje. Tamu što pakazańni ŭ paciarpiełych brali čatyry razy — i ŭsie čatyry razy pakazańni byli roznyja», — śćviardžaje Maksim.
Pa jaho słovach, Jalec taksama admoviŭsia pryznać vinu i davać pakazańni.
«Paciarpiełyja śćviardžajuć, što kaliści letaś, u adzin ź dzion žniŭnia na palavym vychadzie jany tapili pieč. Paśla ich nibyta padniali, pastroili i pabili. Ale ž siniakoŭ u ich nie było, skarhaŭ nie było, kamandzir pravodziŭ ahlad i ŭsio było narmalna. Jany da kaho nie źviartalisia, nikomu nie skardzilisia. Ja nie viedaju, čamu jany raptam štości takoje pačali kazać u listapadzie. Ale, mahčyma, heta nie ich słovy, — razvažaje Maksim. — Tam ža paciarpiełymi prachodziać nie tolki sałdaty z małodšaha pieryjadu, ale i majho pryzyva, ź jakimi ja słužyŭ hod».
«Paśla taho, jak na mianie zaviali spravu, ja atrymaŭ pastanovu, čamu zaviali. Tam ukazvajecca dakładnaja kolkaść udaraŭ, jak ja kaho nibyta biŭ, jak staviŭ… Heta prosta tryźnieńnie! — aburajecca jon. — Ale ž ja paśla padyjšoŭ da adnaho z paciarpiełych, i spytaŭ, maŭlaŭ, kolki razoŭ ciabie ŭdaryli? Jon staić i plačyma paciskaje, nie viedaje».
Małyška tłumačyć heta nastupnym čynam:
«Heta sałdaty. Heta robaty. Im skazali, jak i što zrabić, jany tak i zrobiać, kab nie mieć prablem.
Heta vielmi mutnaja historyja! Na sudzie moj advakat pytaŭsia ŭ kožnaha paciarpiełaha: «Heta vy źviarnulisia kudyści nakont źbićcia?» Usie admaŭlajuć, nichto ź piaciarych nikudy nie źviartaŭsia. Tady adkul sama situacyja? Plus u sudzie adzin z paciarpiełych sam raspavioŭ, što śledčy zapisvaŭ jaho słovy tak, jak ličyŭ patrebnym. Sudździa pytaŭsia ŭ sałdata, čamu nie supadajuć pakazańni — to ich bili, to paśla jon kazaŭ, što nie bili - a paciarpieły nie moh adkazać. Kaža, što nie moža patłumačyć.
A ja mahu patłumačyć. Tamu što jany sami nie viedajuć svaje pakazańni. Ich zaviali ŭ kabiniet, skazali padpisać i ŭsio. Nie viedaju, chto i navošta.
I ciapier atrymlivajecca tak, što jość piaciora paciarpiełych, jany ž i śviedki. Bolš śviedkaŭ niama. Siniakoŭ niama. Skarhaŭ niama».
Taksama, kaža Maksim, jaho vinavaciać u tym, što jon byŭ pjany ŭ tuju noč.
«I tyja paciarpiełyja spačatku padpisali, maŭlaŭ, tak, jon byŭ napadpitku. A ciapier na sudzie kažuć: nu adkul my viedajem, byŭ jon pjany ci nie.
U ich va ŭsich roznyja pakazańni i viersii. Adzin kaža, što źbivali 40 chvilin, druhi — što piać ci siem. Adzin kaža, što pračynaŭsia i padychodziŭ kamandzir, druhi kaža, što kamandzir spaŭ, treci — što kamandzir pračnuŭsia, ale krykam paklikaŭ ich da siabie ŭ namiot…», — śćviardžaje Małyška.
Akramia taho, kaža Małyška, što padčas śledstva jaho vinavacili ŭ pasobnictvie Jalcu, ale paśla vystavili abvinavačvańnie ŭ niestatutnych uzajemaadnosinach (pa hetym artykule mienšaje pakarańnie). Ale, śćviardžaje Małyška, kali spravu pieradali ŭ prakuraturu, to adtul spravu viarnuli śledčym. I abvinavačvańnie ŭ pasobnictvie viarnuli.
«Naša Niva» źviazałasia z prakuroram Arturam Valentukievičam, jaki vystupaje na pracesie dziaržaŭnym abvinavaŭcam, kab spraŭdzić hety momant, ale jon admoviŭsia ad kamientaroŭ.
Paciarpiełyja słužać u vojsku, tamu atrymać ich kamientary pakul nie ŭdałosia.
Pasiadžeńnie pa spravie praciahniecca 26 krasavika.
