Staršynia Kamitetu dziaržaŭnaj biaśpieki Biełarusi Valeryj Vakulčyk prademanstravaŭ u efiry dziaržaŭnaha telekanału «Biełaruś-1» mabilny telefon, jaki, pavodle jahonych słoŭ, raspracavany ŭ Biełarusi dla zakrytaj uradavaj suviazi, piša «Radyjo Svaboda».
Pra aparat viadoma niašmat. Pavodle Valeryja Vakulčyka, telefon «składajecca z troch častak: mikrafon, kryptamodul i pracesar». Mienavita praz «kryptamodul» telefon vyhladaje dastatkova toŭstym pa sučasnych mierkach, kaža jon. Dziakujučy aparatu, kazaŭ staršynia KDB, Biełaruś «uvajšła ŭ lik dziaržaŭ, jakija majuć sučasnyja technalohii», i takija dziaržavy «možna pieraličyć pa palcach». Ciapier raspracoŭščyki telefona «pracujuć nad tym, kab arhanizavać ekspartnyja pastaŭki pryjaznym da nas dziaržavam».
Niekalki detalaŭ na videa vyklikajuć pytańni
Najpierš kidajecca ŭ vočy davoli kiepskaje aleafobnaje pakryćcio ekranu abo jaho poŭnaja adsutnaść. Na sučasnych smartfonach na ekrany nanosiać takoje pakryćcio, kab škło nie źbirała ślady ad ruk — na aparacie ślady bačnyja vyrazna. Značyć, kali aparat skraduć złamyśniki, im mohuć dastacca vyraznyja adbitki palcaŭ vysokapastaŭlenaha ŭładalnika aparata. Navat jakasnaje fota telefona moža «vydać» adbitki.
Padobna, aparat nia maje skanera adbitkaŭ palcaŭ (nie vidać ni zzadu, ni śpieradu), jaki ciapier časta vykarystoŭvajecca dla identyfikacyi karystalnika — sustrakajecca navat u niedarahich aparatach za 150—200 rubloŭ. Jon ličycca adnosna nadziejnym sposabam abarony telefona ad niepažadanych karystalnikaŭ — prynamsi, bolš nadziejnym za pin-kody, paroli i hrafičnyja klučy, jakija nabirajucca na ekranie (i mohuć być «sčytanyja» pry adsutnaści dobraha aleafobnaha pakryćcia abo «padabranyja» chakierami). Ci jość u telefonie prasunutaja systema raspaznavańnia tvaraŭ abo siatčatki voka, jak u flahmanskich smartfonach Apple i Samsung, nie ŭdakładniajecca.
Taksama padobna, što telefon nia maje asnoŭnaj zadniaj kamery, ale, mahčyma, maje frantalnuju. U niekatorych asobnych «karparatyŭnych» telefonach prybirajuć usie kamery, kab pracaŭniki nie mahli vynosić z kampanii karparatyŭnyja sakrety. Ale ŭ siužecie BT zhadvajecca mahčymaść videasuviazi — vierahodna, frantalnaja kamera ŭ telefona ŭsio ž jość (na videa bačnyja dźvie «ščyliny» nad ekranam, dzie moža być frantalnaja kamera i datčyki aśviatleńnia i nabližeńnia, a taksama ledź bačny niejki blok datčykaŭ sprava ad dynamika).
Ź videa niezrazumieła, na jakoj aperacyjnaj systemie pracuje telefon, ale elementy interfejsu nahadvajuć zvyčajny Android. Kali tak, to heta nie najlepšy vybar — systema ličycca nia samaj nadziejnaj u planie ŭzłomaŭ i virusaŭ. Ale raspracoŭščyki telefona całkam mahli vykarystać jakuju-niebudź madyfikavanuju «biaśpiečnuju» versiju Android (u tym liku takuju, dzie nielha ŭstaloŭvać starońnija prahramy i vychodzić u internet tolki praz admysłovy braŭzer na abmiežavany śpis sajtaŭ) abo asobnuju aperacyjnuju systemu z padobnym da Android interfejsam.
Na videa taksama bačna, što telefon maje port dla padklučeńnia navušnikaŭ standartu mini-jack (ad jakich pastupova admaŭlajucca na karyść biazdrotavych padklučeńniaŭ) i port dla zaradki i pieradačy źviestak standartu microUSB (ciapier pastupova pierachodziać na bolš chutki USB Type C). Ź videa niezrazumieła, ci padtrymlivaje telefon 4G-suviaź — bačna tolki, što jon padklučany da 3G-sietki.
Taŭščynia telefona moža być abumoŭlenaja nie «kryptamodulem», a prosta vialikaj batarejaj (u hetym niama ničoha kiepskaha). Padobnuju formu majuć telefony z padklučanymi źniešnimi čachłami-akumulatarami. U toj ža čas šmat jakija telefony, jakija nazyvajuć «kryptaŭstojlivymi» (naprykład, Blackphone 2 ci BlackBerry DTEK60), nie vyhladajuć takimi toŭstymi, jak biełaruski aparat.
Ci vyrablalisia kampanenty telefona ŭ Biełarusi, ci byli ŭziatyja ad zamiežnych vytvorcaŭ, nieviadoma.
