4 maja Mahiloŭski abłasny sud ahučyŭ vyrak biełarusu Ivanu Jaravomu. Toj atrymaŭ 2 hady kałonii ahulnaha režymu za ŭdzieł u bajavych dziejańniach na Danbasie.
Ivanu — 29 hadoŭ. Jon naradziŭsia ŭ rasijskim Rastovie. Jaho baćka rasiejec, ale kali Ivan jašče byŭ mały, baćki raźvialisia, maci z synam źjechali ŭ Biełaruś. Žyli ŭ horadzie Kruhłaje. Ivan vučyŭsia ŭ prafiesijna-techničnaj vučelni, ale jaje nie skončyŭ. Adsłužyŭ u vojsku, paśla jeździŭ na «šabašku» ŭ Rasiju. U 2014 hodzie znoŭ pajechaŭ na pracu, ale ŭ vyniku akazaŭsia na Danbasie.
Tam Jaravy atrymaŭ pazyŭny «Puškin». Vajavaŭ u składzie kazackaha pałka JarHa, jaki mieścicca ŭ horadzie Antracyt.
Ivan nie curaŭsia žurnalistaŭ, aktyŭna pościŭ fota sa zbrojaj u sacsietkach. Kazaŭ «Radyjo Svaboda», što ličyć siabie kazakam.
Pa słovach Jaravoha, doŭhi čas na Danbasie jon faktyčna nie atrymlivaŭ nijakich hrošaj — byccam by tolki dva razy zapłacili jamu pa 1000 hryŭniaŭ (prykładna $40). Ale paśla padraździaleńni bajavikoŭ stali nabyvać vyhlad rehularnych častak. Bajavikam vydali «vajennyja bilety» «DNR»-«ŁNR», jany stali atrymlivać rehularny zarobak. Šarahovyja bajcy ciapier mieli 15 tysiač rasijskich rubloŭ (kala $190), aficery — da 30 tysiač (kala $380).
«Ciapier i ŭ maim kazackim pałku vydajuć vajennyja bilety, zabieśpiačeńnie. Zaraz u nas faktyčna kadravyja vajskovyja častki. Ciapier my nie ź miortvych «ukropaŭ» źbirajem hryŭni ci niešta tam jašče. Ciapier u nas jość zarpłata.
A to ž było i takoje — lažyć niejkaje zamierzłaje cieła, a my ź jaho ściahvali niešta… A što rabić!», — pryznavaŭsia Ivan.
Jaravoha zatrymlivali: u 2015 hodzie jon pravioŭ tydzień u SIZA ŭ Mahilovie, ale jaho adpuścili. Ivan iznoŭ pajechaŭ na Danbas.
U vieraśni 2016 hoda Jaravy kazaŭ, što viarnuŭsia ŭ Biełaruś i vajavać bolš nie płanuje.
«15 žniŭnia ja paviesiŭ aŭtamat na ćvik, usio, — napisaŭ bajavik karespandentu Radyjo Svaboda ŭ sacyjalnaj sietcy. — Usich pryčyn nie skažu… Skažu adno: ja svajo adbyŭ tam. Buduć «ukry» nastupać, viarnusia, a ciapier mnie i tut niadrenna, saboj zajmusia. Abrydła łamać, budu budavać».
Praŭda, u mai 2017 hoda Jaravy-«Puškin» byŭ zatrymany i asudžany na hod ŁPP, kudy traplajuć ludzi, jakija majuć stałyja prablemy z ałkaholem. Ale Jaravy nie čakaŭ, pakul prysud ustupić u siłu i chucieńka vyjechaŭ ź Biełarusi. Viarnuŭsia na Danbas, słužyŭ u 7-j motastrałkovaj bryhadzie «DNR».
Ale paśla Jaravy iznoŭ viarnuŭsia na radzimu — i byŭ zatrymany. Vynikam stała kryminalnaja sprava i realny termin.
