U Babrujsku rasśledujuć fakt hibieli dyrektarki harmałzavoda Taćciany Karniłavaj. Cieła kiraŭnika było znojdziena ŭ adnym z pamiaškańniaŭ pradpryjemstva ranicaj 8 maja. 47-hadovuju žančynu vyciahnuli ź piatli, ale vyratavać užo nie zmahli. Svajaki kažuć, što žančyna «zanadta blizka ŭsio prymała da serca», piša Tut.by.
— U abied žonka viarnułasia dachaty ŭsia ŭ ślazach. Kaža, Tania pamierła. Pra heta joj susiedzi paviedamili ŭ dvary. Potym patelefanavaŭ syn, usio paćvierdziŭ. Ja nie viedaju, što tam adbyłosia, ale joj dapamahli syści, daviali. Tania zanadta blizka ŭsio prymała da serca, — raspavioŭ śviokar pamierłaj Uładzimir Karniłaŭ.
Pavodle jaho słoŭ, niaviestka była davoli žorstkim i pryncypovym kiraŭnikom, pa-sapraŭdnamu «zaŭzieła» pracaj, addaŭšy pradpryjemstvu nie adzin dziesiatak hadoŭ.
— Paśla sychodu raniejšaha dyrektara [»Babrujskmałaka» Hienadzia] Vitkoŭskaha ŭ 2015 hodzie joj prapanavali zaniać jaho miesca. Pahadziłasia i pačała pavoli mianiać usio na pradpryjemstvie. Pakul chołdynh uznačalvaŭ [Ihar] Kanančuk, usio išło narmalna. Z novym dyrektaram (ciapier AAT «Babuškina krynka» ŭznačalvaje Dźmitryj Hłavinski) jana nie spracavałasia, — raspaviadaje Uładzimir Karniłaŭ. U čym heta vyjaŭlałasia, mužčyna nie patłumačyŭ.
Źleva na piarednim płanie — Taćciana Karniłava (lipień 2016 hoda). Fota: Maksim Mikiešyn, hazieta «Kiraviec».
Pavodle jaho słoŭ, niaviestka nie płanavała praciahvać kantrakt z AAT «Babuškina krynka», jaki pavinien być skončycca niekalki miesiacaŭ tamu. Ale ŭ apošni momant usio pierajhrała.
— Kantrakt ź joj praciahnuli jašče na hod. A niadaŭna na składzie pradpryjemstva była vyjaŭlena niastača pradukcyi. I ja, i syn u adzin hołas joj paŭtarali, što adkazvać za heta buduć zahadčyk składa i buchhałtar. Ale Tania vielmi pieražyvała, jana zaŭsiody zanadta šmat na siabie brała.
Aficyjny pradstaŭnik Śledčaha kamiteta pa Mahiloŭskaj vobłaści Aksana Saleniuk paviedamiła, što pa fakcie hibieli dyrektara pradpryjemstva «Babrujskmałako» pryznačany šerah ekśpiertyz.
U SK taksama paviedamili, što supracoŭnikami ich viedamstva kryminalnaja sprava pa fakcie kradziažu pradukcyi sa składa «Babrujskmałako» nie raspačynałasia.
