Čaćviora terarystaŭ zahinuli pry atacy na pravasłaŭnuju carkvu ŭ Hroznym, stalicy Čačni.
Jak paviedamiŭ čačenski Śledčy kamitet, napadniki byli lohka ŭzbrojenyja, u ich byli tolki hładkastvolnaja zbroja i nažy. Tym nie mienš, im udałosia zabić dvuch i paranić jašče dvuch palicyjantaŭ, jakija achoŭvali carkvu Archanioła Michaiła.
Čačenskija ŭłady śćviardžajuć, što metaj bajevikoŭ byŭ zachop zakładnikaŭ. U carkvie ŭ momant napadu znachodziłasia niekalki dziasiatkaŭ viernikaŭ.
Bolšaść čačencaŭ — musulmanie. Rasiejcaŭ, pravasłaŭnych tam zastałosia niašmat.
Kanflikt u Čačni doŭžycca ad 1991 hoda, kali hetaja rasijskaja aŭtanomija abviaściła niezaležnaść. Aktyŭnyja bajavyja dziejańni vialisia ŭ tak zvanuju «Pieršuju čačenskuju vajnu» ŭ 1994—1996 hadach, a taksama ŭ «Druhuju čačenskuju» ŭ 1999—2000. Paśla hetaha ŭ Čačni jašče dziesiać hadoŭ praciahvałasia partyzanskaja baraćba. Za pieryjad kanfliktu zahinuła kala 12 000 rasijskich vajskoŭcaŭ, kala 21 000 partyzan i — dakładnych ličbaŭ niama — da 50 tysiač mirnych žycharoŭ.
Ciapier Čačnioj dyktatarskimi mietadami kiruje Ramzan Kadyraŭ — syn mufcija krainy Achmata Kadyrava, jaki ŭ Pieršuju čačenskuju padtrymaŭ ruch supracivu, ale ŭ kancy Druhoj čačenskaj pierajšoŭ na bok Maskvy, za što paźniej byŭ zabity padpolščykami.