Insajdarski telehram-kanał «Niezyhaŕ», jaki śpiecyjalizujecca na źlivach z vašejšych ešałonaŭ rasijskaj ułady paviedamlaje imia čynoŭnika, jaki ŭ chutkim časie moža stać pasłom Rasii ŭ Biełarusi. Heta były ministr sielskaj haspadarki, a jašče raniej hubiernatar Krasnadarskaha kraja Alaksandr Tkačoŭ. U novym uradzie Dźmitryja Miadźviedzieva jaho źmianiŭ Dźmitryj Patrušaŭ.
Fota gazeta.ru.
Pakul pasłom Rasii ŭ našaj krainie źjaŭlajecca 77-hadovy Alaksandr Surykaŭ. Jon na hetaj pasadzie ŭžo anamalnuju dla dypłamata kolkaść hadoŭ — ad 2006. Vyhladaje, chutka Surykava adpraviać u adstaŭku.
Chto ž taki Alaksandr Tkačoŭ? Jamu 57 hadoŭ, rodam z Krasnadarskaha kraja. Karjeru budavaŭ u sielskaj haspadarcy, zasnavaŭ najbujniejšy ŭ rehijonie ahrapramysłovy kompleks.
U 1990-ja ŭvachodziŭ u jelcynaŭski palityčny ruch «Naš dom — Rasija», potym pieramiatnuŭsia ŭ KPRF. Abiraŭsia ad jaho ŭ Dziaržaŭnuju dumu, jaho aktyŭna padtrymlivali kazaki. Cikava, što ŭ parłamiencie Tkačoŭ adnačasova ŭvachodziŭ u deputackuju hrupu «Za atłantyčny dyjałoh», jakaja vystupała za supracoŭnictva z NATO, i «AntyNATO».
Ad 2001 hoda Tkačoŭ — hubiernatar Krasnadarskaha kraja. Na vybary jon išoŭ pad łozunham «Haspadarnik. Palityk. Patryjot». Vyłučaŭ łozunh «Kubań — dla kubancaŭ». A taksama kazaŭ, što na Kubani «niama miesca dla cyhanoŭ, turak-mieschiecincaŭ, kurdaŭ i inšadumcaŭ», za što abvinavačvaŭsia ŭ šaviniźmie. Ad 2005 — siabra pucinskaj «Adzinaj Rasii». Pry im byŭ cisk na hramadskija arhanizacyi i žurnalistaŭ kraja.
Ad 2015 — ministr sielskaj haspadarki. Mienavita Tkačoŭ prapanoŭvaŭ źniščać sankcyjnyja pradukty, jakija traplajuć na terytoryju Rasii.
Siamji Tkačova naležyć adzin z najbujniejšych u Rasii ahrakompleksaŭ, jaki zajmajecca ptuška- i śvinahadoŭlaj, małočnaj vytvorčaściu.
Moža być, mienavita tamu Tkačoŭ nastolki zaŭziata vystupaŭ suprać biełaruskaj pradukcyi na rasijskim rynku. Sioleta ŭ krasaviku jon paraiŭ biełarusam šukać inšyja rynki zbytu. A jašče pierad hetym jon zapeŭnivaŭ, što pastaŭki ź Biełarusi razburać «naš rynak».
Maje orden «Za zasłuhi pierad Ajčynaj II stupieni» (2014). U toj samy hod trapiŭ u śpis čynoŭnikaŭ, jakim zabaronieny ŭjezd na terytoryju Jeŭrasajuza.
