U Biełarusi adradzili marožanaje bieź Je-dadatkaŭ. Limitavanuju partyju (500000 pačkaŭ) płambiru pa recepcie 1938 hoda vypuścili na fabrycy brenda «Bieły Polus». Jakraz tut 80 hadoŭ tamu ŭpieršyniu zapuścili masavuju vytvorčaść płambiru.
Novaje-staroje maroziva pa smaku — kłasičny płambir, ale jon ciažejšy, u im bolš viarškoŭ i zaŭvažna mienš «pavietra», zamiest mona- i dyhlicerydaŭ tłustych kisłot vykarystoŭvajecca muka, a termin prydatnaści z-za receptury — u dva razy mienšy, čym zvyčajna. Pasprabavać vafielnyja kubački i eskimo pa adnoŭlenym recepcie 80-hadovaj daŭniny možna budzie tolki ŭ hetym jubilejnym letnim siezonie.
Na etykietcy płambiru bieź Je-dadatkaŭ inhredyjenty, jakija jość u kožnaha na kuchni. Ich usiaho 8 — heta śviežyja viarški, zhuščanaje i suchoje małako, alej, muka, vada, cukar, vanilin. Ale stvaralniki marožanaha adznačajuć, što pryhatavać płambir u chatnich umovach nie vyjdzie. Na vytvorčaści sumieś prachodzić stadyju fryzieravańnia, kali pradukt zamarožvajuć i nasyčajuć pavietranymi burbałkami.
Zvyčajna ŭ płambiry ŭ jakaści stabilizataraŭ užyvajuć piać dadatkaŭ — Je407, E410, Je412, Je466 i Je471 — usio razam abo ŭ roznych kambinacyjach. U «Biełym polusie 1938» ad ich admovilisia, hetuju funkcyju vykonvaje pšaničnaja muka.
Adsiul i inšyja asablivaści marožanaha. Porcyja płambiru biez «Je» važyć 90 hramaŭ, a płambir z dadatkami takoha ž abjomu — 70. Takaja roźnica ŭ vazie źjaŭlajecca za košt muki, jakaja robić strukturu płambiru mienš porystaj i pakidaje ŭ marožanym mienš pavietra.
Kab vypuścić partyju biez «Je», fabrycy pryjšłosia prajhrać technałohiju 30-ch hadoŭ. Navat hłazuru dla eskimo tut vyrablajuć sami pa histaryčnym recepcie — alej, kakava, cukar i bolš nijakich lišnich inhredyjentaŭ.
— «Bieły Polus» — heta nacyjanalny płambir, jaki havoryć pa-biełarusku. Jon zrobleny śpiecyjalna dla biełarusaŭ i budzie pradavacca tolki ŭ našaj krainie, — raspaviadaje Maksim Žurovič, namieśnik dyrektara pa markietynhu brenda «Bieły Polus». — Vypuskajučy jubilejny płambir, my chacieli nahadać kožnamu ab historyi našaj krainy, jakaja składvajecca nie tolki z hučnych padziej, ale i z prostych rečaŭ, blizkich kožnamu.
