Alaksandr Łukašenka prapanoŭvaje Rasii vyznačycca z farmatam prysutnaści pamiežnikaŭ na biełaruska-rasijskaj miažy. Pra heta jon zajaviŭ siońnia pry naviedvańni pahranzastavy «Dzivin» u Kobrynskim rajonie.
Kiraŭniku krainy paviedamili ab stanoviščy na dziaržaŭnaj miažy Biełarusi, mierach pa jaje achovie, vykarystańni sił i srodkaŭ dla vykanańnia zadač pierad orhanami pamiežnaj słužby. Asobna Alaksandr Łukašenka zakranuŭ situacyju na ŭschodnim kirunku.
Jak rastłumačyli pradstaŭniki Dziaržpahrankamiteta, pastajanna dysłakavanych padraździaleńniaŭ orhanaŭ pahransłužby na dadzienym kirunku niama. Adnak pamiežniki pry pastupleńni infarmacyi ab supraćpraŭnaj dziejnaści mohuć kiravacca na miascovaść, u tym liku va ŭzajemadziejańni z orhanami ŭnutranych spraŭ i terytaryjalnych padraździaleńniaŭ orhanaŭ dziaržbiaśpieki. Z rasijskaha boku prysutničajuć štatnyja padraździaleńni pamiežnaj słužby FSB Rasii, jakija faktyčna niasuć achovu dziaržmiažy.
Alaksandr Łukašenka źviarnuŭ uvahu na toje, kab u dziejańni biełaruskich słužbaŭ nie było farmalizmu. «Kali vyrašyli takim kampanientam kantralavać hety kirunak, značyć, jon pavinien jak minimum karyść prynosić. Ale lepš, kab jon byŭ efiektyŭny», — skazaŭ kiraŭnik dziaržavy.
«Ale nam nielha prypadabniacca rasijanam. Jany sami nie razumiejuć, čaho chočuć i što jany robiać na biełaruska-rasijskaj miažy. Niachaj vyznačajucca. Vyznačacca — nam nie prablema adkazać.
My hatovyja ŭ luby momant adekvatna dać adkaz. Kali jany chočuć zakryć miažu — kali łaska. Zakryvajuć — my ŭ adkaz taksama pavinny ŭvieści kantrol na miažy, — padkreśliŭ biełaruski lidar. —
Ci hatovyja z nami jak z sajuźnikami, jak z rodnymi ludźmi razmaŭlać… A miežy — heta pieražytak minułaha, jany karyści mała dajuć dla znosin ludziej, tym bolš pamiž ruskimi i biełarusami. Ale heta ich (rasijskaha boku) prava, heta ich sprava».
«Tamu nam nie treba śpiašacca. My pavinny bačyć, što jany chočuć. My viedajem, dzie jany navyvodzili svaje vojski, stvaryli kamiendatury i inšuju infrastrukturu», — adznačyŭ kiraŭnik dziaržavy.
Alaksandr Łukašenka dadaŭ, što heta pytańnie ŭ tym liku budzie abmiarkoŭvacca ŭ čas Vyšejšaha dziaržsavieta Sajuznaj dziaržavy.
«My pavinny dakładna damovicca ab adnosinach pamiž pamiežnikami, — skazaŭ jon. — Nie pamiežniki ž hetaje pytańnie vyrašajuć. Tam chapaje centraŭ upłyvu i ŭździejańnia. My ciapier u pracesie vyznačeńnia našych sumiesnych pavodzinaŭ na biełaruska-rasijskaj miažy. I śpiašacca nam tut nie treba. Ale toje, što adbyvajecca, my pavinny bačyć».
