Staršynia praŭleńnia «Biełhazprombanka» Viktar Babaryka raskrytykavaŭ artykuł «Sovietskoj Biełoruśsii», pryśviečany pośpiecham biełaruskaha Parka vysokich technałohij. Sam Babaryka, darečy, maje dypłom matematyka-prahramista.
«Voś nie prytrymlivajusia ja parady prafiesara Praabraženskaha z «Sabačaha serca» nie čytać haziet pierad abiedam i naohuł haziet nie čytać, — pačynaje Babaryka. — … 1 červienia 2018 u «Sovietskoj Biełoruśsii» (heta takaja hazieta, jakaja byccam by vystupaje pad brendam «Biełaruś siehodnia»), apublikavanaja natatka «Dapoŭnienaja realnaść», dzie pryviedzieny ličby pa asnoŭnych pakazčykach našaj IT-krainy i samy hałoŭny pralik, jak mnie zdajecca, ich tam vielmi šmat (ličbaŭ) i jany ŭzajemaźviazany. Takaja padača infarmacyi vielmi niezvyčajnaja dla našaj krainy ŭ pryncypie, bo dazvalaje hetyja ličby supastaŭlać, a heta ciahnie za saboj takoje paniaćcie, jak analiz. Što, u pryncypie, vielmi škodna dla hramadzianina, bo luby analiz moža sparadzić dalejšyja vysnovy. A jany mohuć być roznymi. Tamu ŭ nas pryniata nie abciažarvać hramadzian mahčymaściami analizavać — lepš ličbaŭ pamienš, a vysnovy adnaznačnyja — usio nie prosta dobra, a vydatna», — iranizuje Babaryka.
Bankir źviarnuŭ uvahu, što aŭtar artykuła Maksim Osipaŭ nie adroźnivaje paniaćci «dachod» i «prybytak». Prybytak, jak viadoma, roźnica pamiž dachodami i vydatkami.
Maksim Osipaŭ — toj samy analityk «Sovietskoj Biełoruśsii», jaki ledź nie ŭsčaŭ mižnarodny skandał svaimi niedarečnymi vykazvańniami.
Maksim Osipaŭ.
Čytajcie taksama. Palityčny ahladalnik «Sovietskoj Biełoruśsii»: «Polšča — kraina-vyradak. Horšaja chiba što Ukraina»
U siaredzinie artykuła skazana, što prybytak PVT za minuły hod pieravysiŭ miljard dalaraŭ. A ŭ kancy artykuła paznačana, što prahramnaha praduktu jany zrabili na 1 miljard dalaraŭ. Zroblena heta 237 kampanijami z 33200 supracoŭnikaŭ z zarobkam 4000 rubloŭ.
Dalej Viktar Babaryka zadajecca pytańniem, na jakoje ž sam iranična adkazvaje:
«Jak možna vyrabić prahramnaha praduktu na 1 miljard, jak minimum, vypłacić zarobak i atrymać prybytak, jaki pieravyšaje 1 miljard?
Mahčymyja varyjanty adkazaŭ:
- Samy lepšy — pamyłka druku. Tady budu čakać karekciroŭki, ale bajusia — nie dačakajusia. Aŭtar nie ŭvachodzić u maje FB-siabry, a hazieta dakładna nie zaŭvažyć asabistaha posta ŭ stužcy.
- Prytrymlivajučysia nazvy artykuła — heta ŭsio adbyvajecca ŭ dapoŭnienaj realnaści, u jakuju ja jašče nie pahruziŭsia, a značyć, pajdu pracavać nad saboj.
- U PVT jość schavanyja ad šyrokaj hramadskaści vyrablenyja tavary (naprykład IT-bulba, IT-miasa, IT-małako ci niešta jašče, akramia prahramnaha pradukta), što dajuć nievierahodnuju rentabielnaść, jakaja dazvalaje atrymlivać miljardny prybytak. Tady vydychnu i pajdu ich šukać na pryłaŭkach mahazinaŭ.
- Moža, heta rozny dalar. Ja ŭžo pisaŭ, što prybytak napisany słovam miljard i asobna «Dalaraŭ» ź vialikaj litary, a ŭvieś abjom vyrablenaha prahramnaha praduktu - ličbaj 1 miljard dalaraŭ z maleńkaj. Varyjant adkazu mnie padabajecca, ale nie viedaju, čym jany adroźnivajucca (akramia napisańnia) i jaki z dvuch dalaraŭ lepš.
- Nijakich vydatkaŭ u kampanij PVT naohuł niama — zarpłaty usie viartajucca, usie vytvorčyja mahutnaści nabyvajucca za košt supracoŭnikaŭ, a vydatki imi ž pakryvajucca za košt čahości mnie nieviadomaha. Tady heta sapraŭdy naša śvietłaja budučynia i ja narešcie dažyŭ da novaj supolnaści ludziej — IT-čałaviek. Bieskaryślivy, jaki prypłačvaje za prava žyć i pracavać u IT-krainie. Tady saramliva zmaŭkaju, bo hrešny - zarpłatu atrymlivaju i vydatki arhanizacyi nie kampiensuju. Ale jość majaki — budu trymać aryjencir».
