Čytačy «Našaj Nivy» raspaviali, što nočču ŭ subotu, z 2 na 3 červienia, milicyja zatrymlivała na Zybickaj minakoŭ, paśla čaho ich na aŭtazakach advozili ŭ adździaleńnie, dzie składali pratakoły.
Atrymać adkaz ad pres-słužbaŭ nie atrymlivałasia na praciahu niekalkich hadzin. Ale pad viečar na sajcie minskaj milicyi źjaviŭsia artykuł, pryśviečany paradku na vulicy Zybickaj.
Fota - bdz.by
Milicyja paviedamiła, što «ŭvahu pravaachoŭnikaŭ pryciahvajuć hramadzianie, jakija raśpivajuć śpirtnyja napoi pa-za ŭstanovami, raźmieščanymi na Zybickaj, u pryvatnaści na nabiarežnaj raki Śvisłač, a taksama na samoj vulicy (pa-za barami i letnimi terasami)».
Paśla milicyja nazvała paviedamleńni pra «chapun» i praciahłaje znachodžańnie zatrymanych u adździaleńni «dadumkami psieŭdažurnalistaŭ». Ale ž paćvierdziła, što zatrymali niekalki dziasiatkaŭ čałaviek, na jakich paśla skłali pratakoły.
«U minułyja vychodnyja supracoŭnikami milicyi za raśpićcio śpirtnych napojaŭ na nabiarežnaj raki Śvisłač la Zybickaj, a taksama za znachodžańnie ŭ stanie ałkaholnaha apjanieńnia byli zatrymany niekalki dziasiatkaŭ čałaviek. Zatrymanyja byli dastaŭleny dla dalejšaha razhladu ŭ Centralnaje RUUS stalicy, dzie ŭ dačynieńni da ich byli składzienyja administracyjnyja pratakoły pa art.17.3 («Raśpićcio ałkaholnych, słabaałkaholnych napojaŭ ci piva, spažyvańnie narkatyčnych srodkaŭ abo psichatropnych rečyvaŭ, ich anałahaŭ u hramadskim miescy abo źjaŭleńnie ŭ hramadskim miescy abo na pracy ŭ stanie apjanieńnia»), — paviedamili milicyjanty. —
Paśla składańnia nieabchodnych administracyjna-pracesualnych dakumientaŭ dastaŭlenyja byli adpuščanyja. Adzinym zatrymanym da paniadziełka akazaŭsia hramadzianin, užo pryciahvaŭsia raniej da adkaznaści pa art.17.3 KaAP, jaki nie zrabiŭ adpaviednych vysnoŭ i ranicaj u paniadziełak byŭ dastaŭleny ŭ sud dla razhladu».
«Naša Niva» źviazałasia z Paŭłam, tym «zatrymanym da paniadziełka hramadzianinam». Jon paćvierdziŭ, što paśla «rejda» pad vartaj pakinuli tolki jaho. Ale, na dumku chłopca, tak adbyłosia, bo jon bolš za inšych aburaŭsia absurdnaściu situacyi.
«Ja što, z bara musiŭ kryštalna ćviarozym vyjści?» — zadajecca pytańniem Pavał.
Darečy, ranicaj u paniadziełak sud pakaraŭ jaho štrafam u 2 bazavyja vieličyni (49 rubloŭ).
