Kiraŭnik SK Ivan Naskievič prakamientavaŭ spravu himnazista Danata Skakuna, jaki napaŭ na nastaŭnicu, a sprava atrymała hučny hramadski rezanans, paviedamlaje Tut.by.
Staršynia SK adkazaŭ na pytańnie žurnalista pra toje, čamu nie byŭ praviedzieny śledčy ekśpierymient pa spravie i čamu pryznańnie padletak pisaŭ nočču paśla zatrymańnia.
— Nijakich śledčych dziejańniaŭ nočču ź im (z Danatam Skakunom) nie pravodziłasia, nočču jon tolki sam napisaŭ zajavu, u jakoj raśpisaŭ praces taho, što adbyłosia ŭ škole pamiž im i nastaŭnikam. Nichto jaho nie dapytvaŭ, usie dopyty byli ŭ prysutnaści jaho abaroncaŭ — tut niama ŭ nas nijakich pytańniaŭ, — raspavioŭ Ivan Naskievič.
Na dumku kiraŭnika SK, z asudžanaha padletka nie varta rabić achviaru.
— Prysud daŭno ŭstupiŭ u zakonnuju siłu. Ni ŭ nas, ni ŭ suda niama nijakich sumnieńniaŭ u tym, što jon vinavaty. Mahčyma, rezanans, jaki byŭ u hetaj spravy, zrabiŭ jamu tolki horš. Ja dapuskaju, što jon moh by, moža, davać pakazańni (padčas śledstva Danat Skakun admoviŭsia davać pakazańni) Kali ich niama, to jaki moža być śledčy ekśpierymient? Na asnovie čaho jaho pravodzić? Vydumlać jaho my nie majem nijakaha prava.
— Ale jon ža ŭ pieršuju noč, pa vašych słovach, usie raśpisaŭ, - udakładnili žurnalisty.
- A potym źjaviŭsia advakat, baćki, jakija ź im pahavaryli. Paśla hetaha pazicyja stała inšaja — tut usio absalutna prosta.
Na dumku Ivana Naskieviča, zaraz padletku «treba dumać ab umoŭna-daterminovym vyzvaleńni», a nie pra toje, jak «zrabić ź siabie achviaru».
