Namieśnik staršyni Viarchoŭnaha suda prypyniŭ vykanańnie śmiarotnych prysudaŭ ŭ adnosinach da Ihara Hieršankova i Siamiona Bieražnoha na čas razhladu ich nahladnych skarhaŭ. Pra heta pravaabaroncam centra «Viasna» stała viadoma ad svajakoŭ asudžanych da vyšejšaj miery.
Termin razhladu nahladnaj skarhi — miesiac z momantu jaje pastupleńnia da słužbovaj asoby. Heta značyć, što ciaham nastupnaha miesiaca prysud u adnosinach da Hieršankova i Bieražnoha nie budzie pryviedzieny ŭ vykanańnie.
Pa prysudzie Mahiloŭskaha abłasnoha suda 21 lipienia Siamion Bieražnoj, a taksama muž i žonka Ihar i Taćciana Hieršankovy abvinavačvalisia ŭ ździajśnieńni zabojstvaŭ i padrychtoŭcy da ździajśnieńnia zabojstvaŭ, vykradańni čałavieka i padrychtoŭcy da vykradańnia, a taksama ŭ machlarstvie, razboi, vymahalnictvie, kradziažy abo źniščeńni dakumientaŭ. Taćcianu Hieršankovu dadatkova abvinavacili ŭ niezakonnym abarocie narkotykaŭ abo psichatropaŭ. Sudom było ŭstanoŭlena, što złačynnaja hrupa ahułam zarabiła na machinacyjach z čužym žyllom bolš za 2 miljardy niedaminavanych rubloŭ.
Udzielnikam złačynnaj hrupoŭki byli vyniesienyja nastupnyja prysudy: Iharu Hieršankovu — vyšejšaja miera pakarańnia - rastreł; Siamionu Bieražnovu — vyšejšaja miera pakarańnia - rastreł; Taćcianie Hieršankovaj — 24 hady turmy z kanfiskacyja majomaści; Barysu Kaleśnikavu — 22 hady i 1 miesiac kałonii strohaha režymu.
20 śniežnia 2017 hoda Kalehija pa kryminalnych spravach Viarchoŭnaha suda Biełarusi vyniesła rašeńnie pa apielacyjnych skarhach dvuch fihurantaŭ tak zvanaj spravy mahiloŭskich «čornych ryełtaraŭ»: Ihara Hieršankova i Barysa Kaleśnikava: prysud Mahiloŭskaha abłasnoha suda ad 21 lipienia pakinuć u sile, a skarhi biez zadavalnieńnia.
