U čaćvier Siejm Łatvii pryniaŭ u kančatkovym čytańni papraŭki da zakona ab VNU, jakija praduhledžvajuć zabaronu na navučańnie na ruskaj movie ŭ pryvatnych VNU i kaledžach, piša Delfi.
Ministerstva adukacyi i navuki krainy prapanuje dazvolić VNU i kaledžam, jakija realizujuć prahramy navučańnia na movie, jakaja nie adpaviadaje patrabavańniam zakona, praciahnuć ich realizacyju da zakančeńnia terminu akredytacyi prahram. Adnak paśla 1 studzienia 2019 hoda pryjom studentaŭ na takija prahramy nie budzie dazvoleny.
Zhodna ź dziejučym zakonam, na zamiežnaj movie dazvalajecca vieści navučańnie pa tych prahramach, dzie heta nieabchodna dla dasiahnieńnia metaŭ navučańnia (moŭnyja i kulturnyja prahramy).
Jak rastłumačyli ahienctvu LETA u ministerstvie, źmieny, jakija rehulujuć užyvańnie movaŭ u pryvatnych VNU, iduć za niadaŭna zaćvierdžanymi papraŭkami ŭ zakon ab adukacyi, jakija praduhledžvajuć pastupovy pierachod na navučańnie tolki na dziaržaŭnaj movie ŭ siaredniaj škole.
Da hetaha času zakon ab VNU rehulavaŭ vykarystańnie moŭ tolki ŭ dziaržaŭnych VNU.
Navučańnie ŭ VNU, jak i raniej, možna budzie pravodzić na adnoj z movaŭ ES. U dziaržaŭnych VNU Łatvii navučańnie na movach ES mahčymaje tolki ŭ asobnych vypadkach — dla zamiežnych studentaŭ i pa prahramach, praduhledžanych dahavorami pra mižnarodnaje supracoŭnictva. Pry hetym zamiežnyja studenty abaviazkova vyvučajuć łatyšskuju movu, kali navučańnie doŭžycca bolš čym 6 miesiacaŭ.
Prykładna tracina studentaŭ pryvatnych VNU Łatvii vučylisia letaś na ruskaj movie.
