Biełaruskaja miemaryjalnaja carkva ŭ Łondanie naminavanaja na premiju Suśvietnaha fiestyvalu architektury. Pra heta Tut.by raspavioŭ brytanski architektar Czyvaj So (Tszwai So), jaki kiravaŭ budaŭnictvam hetaj carkvy, a nieŭzabavie staŭ jaje viernikam.
Suśvietny fiestyval architektury — najbujniejšy ŭ śviecie fiestyval, na jakim demanstrujucca adny z samych uražalnych novabudoŭlaŭ płaniety. Kožny hod jon źbiraje bolš za 2 tysiačy architektaraŭ z usiaho śvietu. Premija fiestyvalu ličycca «Oskaram» u śfiery architektury.
Biełaruskaja hreka-katalickaja carkva ŭ Łondanie naminavana adrazu na dźvie premii: «Suśvietny relihijny budynak hoda» i «Najlepšaje vykarystańnie draŭniny». Heta adziny relihijny budynak ź Vialikabrytanii, jaki ŭvajšoŭ u lik finalistaŭ.
28 listapada architektar Czyvaj So adpravicca na fiestyval u Amsterdam, kab pradstavić svaju pracu žury, u skład jakoha ŭvojduć samyja viadomyja architektary śvietu.
Kankurentami biełaruskaj carkvie ŭ Łondanie buduć relihijnyja pabudovy z Turcyi, Irana, Aŭstralii, Tajłanda, Indyi, Sinhapura i Partuhalii.
— Ja vielmi rady. Nie tolki tamu, što hety budynak — adzinaja relihijnaja pabudova ź Vialikabrytanii, jakaja była naminavana na premiju. Heta taksama i adziny biełaruski budynak-finalist. Bo ja liču, što jon i brytanski, i biełaruski, — raspaviadaje Czyvaj So.
