Novym prezidentam Mieksiki abrany Andres Manuel Łopies Abrador, paviedamlajuć infarmahienctvy. Łopies Abrador — kandydat ad levych siłaŭ z kaalicyi «Razam stvorym historyju».
Nacyjanalny vybarčy instytut apublikavaŭ dadzienyja tak zvanaha chutkaha padliku hałasoŭ. Łopies Abrador nabraŭ 53-53,8%, u jaho bližejšaha kankurenta, pradstaŭnika kaalicyi «Napierad, dziela Mieksiki» Rykarda Anaja - kala 22,1-22,8%.
Usie supierniki Łopiesa Obradora pryznali parazu.
Jak paviedamlałasia, 1 lipienia ŭ Mieksicy adbylisia ŭsieahulnyja vybary, na jakich hramadzianam treba było abrać prezidenta i abnavić skład parłamienta. Adnačasova ŭ bolšaści rehijonaŭ prajšli vybary ŭ miascovyja orhany ŭłady.
Łopiesa Abradora nazyvajuć u Mieksicy «Amlo» (abrevijatura ź pieršych litar poŭnaha imia).
Praciŭniki krytykavali jaho za levy papulizm i nazyvali «Čaviesam i Trampam u adnoj asobie». Mnohija aścierahajucca, kab jon nie zavioŭ Mieksiku tudy ž, kudy zavioŭ Vieniesuełu niabožčyk Uha Čavies. Z Trampam jaho paraŭnoŭvajuć za nieluboŭ da krytyki ŭ presie. Adnym ź pieradvybarnych abiacańniaŭ Łopiesa Abradora było «pryvieści ŭ prytomnaść» amierykanskaha prezidenta, jaki abiacaŭ adharadzicca ścianoj ad mieksikanskich imihrantaŭ.
