Pieršaja pałova lipienia — nie samy lepšy čas dla amataraŭ panazirać za zornym niebam. Sonca jašče nie apuskajecca dastatkova hłyboka pad haryzont, i viačerniaje źmiarkańnie prosta pierachodzić u ranišniaje, nie dajučy darohu ciemry. Navat Mlečny Šlach zaraz bačny chiba što na poŭdni Biełarusi, chacia fotakamiera dazvalaje «ŭbačyć» jaho i tam, dzie čałaviečaje voka ledź zaŭvažaje hetuju tumannuju pałasu.
Ale mienavita ŭ hetyja dni možna ŭbačyć za adnu noč ažno čatyry płaniety Soniečnaj sistemy. Adrazu paśla zachodu Sonca nizka na zachadzie možna ŭbačyć jarkuju zorku — heta płanieta Vieniera. Na paŭdniovym zachadzie źziaje nie mienš jarki Jupiter. Nizka-nizka na poŭdni bližej da apoŭnačy možna ŭbačyć Saturn, i ŭ toj ža čas na paŭdniovym uschodzie źjaŭlajecca niejmavierna jarki aranžavy Mars. Darečy, Mars niezdarma źziaje niby pražektar: 27-ha lipienia ŭ jaho budzie procistajańnie — momant najbolšaha zbližeńnia ź Ziamloj. Pryčym heta budzie nie prostaje, a tak zvanaje Vialikaje procistajańnie, najbolšaje zbližeńnie za apošnija 15 hod.
Usie płaniety ŭ hetym hodzie nazirajucca vielmi nizka, tamu šukajcie miescy z adkrytym haryzontam, najlepiej — za horadam. Naprykład, u pojmie Niomana siarod viekavych duboŭ, dzie i byli zroblenyja hetyja zdymki.
Jupiter nad chvalami Niomana.
Na poŭnačy — Vialikaja Miadźviedzica na fonie śvietłaha haryzonta.
Zaraz samy jarki abjekt načnoha nieba — heta-Mars.
Mlečny Šlach ledźvie prabivajecca skroź śvietłaje nieba. Darečy, biełaja zorka ŭnizie Mlečnaha Šlachu — płanieta Saturn.
Miesiac uzychodzić.
