Supracoŭnik milicyi Michaił Hramyka 30 červienia padtrymaŭ abaroncaŭ Kurapataŭ i nieŭzabavie byŭ zvolnieny. Potym asudžany na sutki, jakija ciapier adbyvaje ŭ CIP na Akreścina, dzie da hetaha pracavaŭ.
Fota: Hanna Šapućka.
Pra heta paviedamiŭ aktyvist Leanid Kułakoŭ padčas kruhłaha stała pa abaronie Kurapataŭ, što adbyŭsia 12 lipienia na siadzibie BNF. Nieviadoma, kali dakładna byŭ zvolnieny Michaił Hramyka (chutčej za ŭsio, užo 2 lipienia, u pieršy pracoŭny dzień paśla jaho ŭdziełu ŭ kurapackaj vachcie), u jaki dzień adbyŭsia sud i jaki termin jon atrymaŭ. Ale viadoma, što jaho pavinny vyzvalić 15 lipienia.
Fota: Hanna Šapućka.
Jak paviedamiła ŭ svaim Fejsbuku kiraŭnica inicyjatyvy «Za ŭratavańnie memaryjału Kurapaty» Hanna Šapućka, 30 červienia Michaił Hramyka dałučyŭsia da vachty ŭ Kurapatach, dapamahaŭ abaroncam supraćstajać pravakataram. Jon asabista pamiataŭ šmatlikich eks-palitviaźniaŭ: pracavaŭ nahladčykam u CIP na Akreścina, kali tam siadzieli Leanid Kułakoŭ, Źmicier Daškievič i Pavieł Sieviaryniec. Znajomstva z apošnim najbolš uraziła Michaiła Hramyku i paŭpłyvała na rašeńnie pryjści ŭ Kurapaty. Jon raskazvaŭ abaroncam, što stamiŭsia vykonvać pracu naziralnika. Za kratami zastajucca taksama abaroncy Kurapataŭ Maksim Viniarski (vyzvalicca 13 lipienia) i Alaksiej Turovič (vyzvalicca 14 lipienia).
