Vialikaje žury pradjaviła zavočnyja abvinavačvańni 12 supracoŭnikam rasijskich śpiecsłužb, ich padazrajuć va ŭzłomie kampjutarnych sietak kandydata ŭ prezidenty ZŠA ad demakrataŭ Chiłary Klintan i sietak samoj partyi, paviedamiŭ na bryfinhu pieršy namieśnik ministra justycyi Rod Rozienstajn.
Hetyja abvinavačvańni zroblenyja ŭ ramkach rasśledavańnia pa Rasii, jakoje pravodzić prakuror Robiert Miuler. Rasśledavańnie źviazana ź mierkavanym zamiežnym umiašańniem u chod prezidenckich vybaraŭ u ZŠA. Rasija nieadnarazova adchilała padobnyja abvinavačvańni ŭ svoj adras.
Pavodle Rozienstajna, havorka idzie pra 12 supracoŭnikaŭ Hałoŭnaha ŭpraŭleńnia Hienštaba Uzbrojenych sił Rasii, jakich vinavaciać u kradziažy imionaŭ i parolaŭ vałancioraŭ pieradvybarnaj kampanii Chiłary Klintan, a taksama danych kiraŭnika jaje pieradvybarčaha štaba Džona Padesty. Śćviardžajecca, što supracoŭniki śpiecsłužby, jakaja raniej nazyvałasia HRU, taksama ŭzłamali kampjutarnuju sietku Nacyjanalnaha kamiteta Demakratyčnaj partyi. Pavodle Rozienstajna, chakierskija dziejańni pačalisia prykładna ŭ sakaviku 2016 hoda.
U abvinavaŭčym zaklučeńni havorycca pra zmovu, meta jakoj — ździajśnieńnie złačynstva suprać ZŠA, a taksama pra kradziež asabistych danych i zmovu z metaj admyvańnia hrošaj.
