Jak paviedamlaje pres‑słužba prezidenta, A.Łukašenka nahadaŭ, što Biełaruś i Vjetnam abjadnoŭvajuć značnyja histaryčnyja suviazi — biełaruskija vajskoŭcy brali ŭdzieł u vyzvalenčaj vajnie ŭ Vjetnamie, biełaruskija śpiecyjalisty šmat zrabili dla stvareńnia vjetnamskaj ekanomiki.
Pavodle słoŭ kiraŭnika dziaržavy, u adnosinach Biełarusi i Vjetnama «niama zakrytych tem» i supracoŭnictva ažyćciaŭlajecca va ŭsich śfierach. Pry hetym, padkreśliŭ A.Łukašenka, dźvium krainam nieabchodna aktyvizavać handlova‑ekanamičnyja adnosiny ŭ adpaviednaści z najaŭnym patencyjałam.
«Tavaraabarot niadrenny, jon raźvivajecca, ale ŭsio ž heta nie tyja ličby, jakija pavinny być. Užo siońnia my mahli b mieć tavaraabarot u 10 razoŭ bolšy», — skazaŭ prezident.
A.Łukašenka vykazaŭ pažadańnie, kab nastupny pasoł Vjetnama staviŭsia da svajoj dypłamatyčnaj misii ŭ Biełarusi hetak ža dobrasumlenna, jak Vu Suan Niń. Pavodle słoŭ prezidenta, biełaruski bok z zadavalnieńniem vykarystaŭ by i ŭ dalejšym vopyt Vu Suan Ninia na karyść dźviuch dziaržaŭ. A.Łukašenka zaznačyŭ, što pasoł, jaki zaviaršaje svaju misiju, u budučym moh by aktyŭna dapamahać raźvićciu handlova‑ekanamičnych suviaziej pamiž Biełaruśsiu i Vjetnamam.
U svaju čarhu Vu Suan Niń padkreśliŭ, što Biełaruś stała dla jaho faktyčna rodnaj krainaj. Jon nahadaŭ, što braŭ udzieł u pracesie ŭstalavańnia dypłamatyčnych adnosinaŭ pamiž dźviuma dziaržavami.