«Biełaruskaje kiraŭnictva zakłapočanaje stanam zakonnaści ŭ siłavych strukturach. I maje namier vyrašać isnujučyja prablemy žorstkaściu pakarańnia vinavatych i ideałahičnaj apracoŭkaj», — ličyć aŭtar Belarus Security Blog.
25 lipienia sudom Barysaŭskaha rajona razhledžana kryminalnaja sprava pa abvinavačvańni byłoha kamandzira 60-ha asobnaha pałka suviazi armii Biełarusi pałkoŭnika Siarhieja Haradzinskaha va ŭtojvańni złačynstva, ździejśnienaha jaho padnačalenym. Prysudam jamu pryznačana pakarańnie ŭ vyhladzie pazbaŭleńnia voli na dva hady sa štrafam i pazbaŭleńniem prava zajmać kirujučyja pasady terminam na piać hadoŭ. Pałkoŭnik byŭ uziaty pad vartu ŭ zale suda nieadkładna.
Heta nie pieršy vypadak sudovaha raźbiralnictva pa fakcie parušeńnia zakanadaŭstva vajskoŭcami za apošnija miesiacy. Tak, u biahučym miesiacy ŭ Homieli byŭ asudžany vajskoŭca Dziaržpahrankamiteta Biełarusi za niestatutnyja adnosiny. U krasaviku ŭ sud Barysaŭskaha rajona byli nakiravany dla razhladu jašče try kryminalnyja spravy ŭ dačynieńni da vajskoŭcaŭ. Adna ź ich — u dačynieńni da aficera pa fakcie ŭžyvańnia im hvałtu da padnačalenych — razhledžana. Abvinavačany pryznany vinavatym, prysudžany da troch hadoŭ pazbaŭleńnia voli i pazbaŭleny vajskovaha zvańnia. U mai ŭ Hrodnie pa abvinavačańni ŭ ździajśnieńni vajskovych złačynstvaŭ asudžanyja na 3,5 i 4 hady pazbaŭleńnia voli dvoje vajskoŭcaŭ biełaruskaj armii.
Kiraŭnictva Biełarusi zakłapočana pytańniami kiravalnaści ŭ siłavych strukturach, častkaj jakoj źjaŭlajecca stan zakonnaści i maralna-psichałahičny klimat. 5 lipienia padčas pryjomu vypusknikoŭ vajskovych navučalnych ustanoŭ i vyšejšaha aficerskaha składu Alaksandr Łukašenka asabliva padkreśliŭ nieabchodnaść umacavańnia dyscypliny i zdarovaha maralna-psichałahičnaha klimatu ŭ voinskich kalektyvach, važnaść asabistaha prykładu aficeraŭ.
Prablemy dyscypliny i zakonnaści ŭ siłavych strukturach Biełarusi nosiać sistemny charaktar i nie mohuć być vyrašanyja tolki za košt ŭhavoryŭ abo žorstkaści pakarańniaŭ. Nieabchodnaja šyrokaje koła mier matyvacyi (i nie tolki materyjalnaj) siłavikoŭ da naležnaha vykanańnia słužbovych abaviazkaŭ. A taksama źmianieńnie samoj kultury kiravańnia ŭnutry siłavych struktur i ich adnosin z hramadstvam. Adnak biełaruskija ŭłady nie pojduć na jakuju-niebudź značnuju transfarmacyju siektara nacyjanalnaj biaśpieki, bajučysia pasłableńnia siłavych viedamstvaŭ. Asnoŭny ŭpor i dalej budzie rabicca na žorstkaść pakarańnia za parušeńni zakonnaści i ideałahičnuju apracoŭku siłavikoŭ, jakija razhladajucca kiraŭnictvam Biełarusi jak univiersalnyja instrumienty kantrolu i kiravańnia.
