Niekalki śviataroŭ Ruskaj pravasłaŭnaj carkvy paskardzilisia na prablemy z atrymańniem šenhienskich viz praz konsulstva Hrecyi. Jak vyśvietliła BBC, heta źviazana z kanfliktam pamiž RPC i Kanstancinopalskim patryjarchatam z-za mahčymaj aŭtakiefalii Ukrainskaj carkvy — stvareńniem na Ukrainie samastojnaj pravasłaŭnaj carkvy.
Pra toje, što ŭ śviataroŭ RPC uźnikajuć prablemy z atrymańniem hrečaskich viz, stała viadoma na hetym tydni.
Nastajaciel chrama Sierhija Radaniežskaha ŭ Maskvie Viktar Biks raspavioŭ RIA Novosti i RBK, što chacieŭ razam ź siamjoj pajechać na Afon, ale jamu pryjšła admova ŭ šenhienskaj vizie z farmuloŭkaj «niama abhruntavańniaŭ znachodžańnia na terytoryi Hrecyi».
U kancy lipienia ŭ vizie admovili jašče adnamu maskoŭskamu śviataru, namieśniku kiraŭnika carkoŭnaha adździeła pa dabračynnaści i sacyjalnym słužeńni Alaksandru Alešynu. Jon raspavioŭ Bi-bi-si, što ŭžo byŭ u Hrecyi šmat razoŭ i nikoli nie atrymlivaŭ admovaŭ u vizach.
Pradstaŭnik hrečaskaha konsulstva ŭ Maskvie admoviŭsia adkazvać na pytańni BBC.
«Heta palityka hrečaskaha ŭrada. Ciapier śviatary RPC usprymajucca jak patencyjnyja špijony i ahienty ŭpłyvu», — raspaviała krynica, blizkaja da Kanstancinopala.
Pra toje, što prablemy ź vizami ŭ śviataroŭ źviazanyja z pracesam aŭtakiefalii va Ukrainie, BBC raskazała krynica ŭ RPC i paćvierdziła krynica, blizkaja da Kanstancinopala.
