13 žniŭnia ŭ Hancavičach pamior dvuchmiesiačny chłopčyk, paśla taho jak jamu ŭkałoli planavyja pryščepki. 14 žniŭnia Svabodzie stała viadoma, što prynamsi jašče adna dziaŭčynka takoha ž uzrostu trapiła ŭ reanimacyju.
Viktoryja Sukač ź vioski Vialikija Kruhovičy Hancavickaha rajonu pryjšła ŭ viaskovy felčarska-akušerski punkt z dačkoj na pryščepku pryblizna ŭ toj samy čas, kali i maci pamierłaha chłopčyka Kiryła Volha Rabcevič. Žančyny navat pierakinulisia niekalkimi frazami.
«Volha jašče spytała — što rabić, kali što? Ja skazała — hrudźmi supakojvaj», — kaža Viktoryja Sukač.
Ciapier Viktoryja z dvuchmiesiačnaj dačkoj Uljanaj u reanimacyi ŭ dziciačym špitali ŭ Baranavičach. Tudy jaje pryvieźli, kali ŭ dziciaci paśla pryščepak padniałasia temperatura.
«Pryščepku dačka atrymała pryblizna ŭ 11:30. Pryjšli dachaty, praz hadzinu pamierali temperaturu, było 37,2. Dzicia pajeła i adrazu ŭsio zryhnuła takim kisłym małakom. Źviarnułasia ŭ ambulatoryju, kab vypisali biaspłatny recept dziciaci. Uvieś čas dzicia było ŭ mianie na rukach, histeryčna płakała, zadychałasia. Nia viedali, što rabić, vyklikali chutkuju. Urač chutkaj nas ahledzieŭ dy adrazu na reanimacyju ŭ Hancavičy nakiravaŭ. U reanimacyi niešta ŭkałoli, pastavili kropielnicu, dačka paspała. Potym pryjechali baranavickija lekary, pahladzieli i vyrašyli nas zabrać. A 20-j hadzinie my ŭžo byli ŭ Baranavičach u reanimacyi», — kaža Viktoryja.
Pavodle Viktoryi, jaje dačce, jak i pamierłamu chłopčyku, kałoła pryščepki lekarka z Aharevickaj ambulatoryi, jakaja pryjaždžała ŭ FAP u Vialikija Kruhovičy.
«Nam dva šprycy ŭkałoli adrazu. Adzin z francuskaj pryščepkaj, druhi — z karejskaj, ad hiepatytu, słupniaku», — kaža Viktoryja.
Viktoryja kaža, što lekary zapeŭnili jaje, što ŭsio budzie dobra, «samaje strašnaje minuła». Viktoryja kaža, što hetyja pryščepki raniej kałoli dzieciam u try hady, a ciapier vyrašyli ŭ 2 miesiacy.
