Nievialikaja vioska na paŭdniovym uźbiarežžy Novaj Ziełandyi płanuje pajści na radykalnyja miery pa abaronie dzikaj pryrody — zabaranić usich svojskich katoŭ.
Fota: pxhere.
Zhodna ź inicyjatyvaj, prapanavanaj rehijanalnaj radaj, usie haspadary katoŭ u Amaŭi buduć abaviazany kastryravać svaich hadavancaŭ, zabiaśpiečyć ich mikračypami i zarehistravać pa miescy žycharstva.
Paśla śmierci žyvioły zavieści novaha kata budzie ŭžo nielha.
Miera ŭvodzicca ŭ jakaści ekśpierymienta: u vypadku pośpiechu jaje płanujecca raspaŭsiudzić i na inšyja rehijony.
Prychilniki hetaha ekstremalnaha kroku kažuć, što koški niasuć adkaznaść za hibiel vialikaj kolkaści ptušak i mlekakormiačych štohod — i, pa ich słovach, vinavatyja ŭ hetym vyklučna ludzi.
Doktar Piter Mara, jaki ŭznačalvaje Śmitsanaŭski centr pieralotnych ptušak, napisaŭ mnostva artykułaŭ i knih pa hetym pytańni.
Jon kaža, što nie ličyć siabie nienaviśnikam katoŭ i ničoha nie maje suprać utrymańnia hetych žyvioł u kvatery.
«Katy — cudoŭnyja hadavancy, całkam niejmaviernyja žyvioły! Ale im nielha dazvalać razhulvać, dzie im zamaniecca, — heta ž samaje vidavočnaje rašeńnie», — patłumačyŭ jon svaju pazicyju ŭ intervju Bi-bi-si.
«My ž nikoli nie dazvalajem ničoha padobnaha sabakam. Pryjšoŭ čas pačać abychodzicca i z katami hetak sama, jak my abychodzimsia z sabakami», — arhumientuje navukoviec.
Čynoŭniki ŭ Amaŭi zajaŭlajuć, što hetaja miera apraŭdanaja, pakolki kamiery videanazirańnia zafiksavali, jak koški palujuć na ptušak, nasiakomych i paŭzunoŭ u vakolicach vioski.
Aktyŭny prychilnik zabarony katoŭ, staršynia dabračynnaha fondu abarony dzikaj pryrody Amaŭi Džon Kolinz śćviardžaje, što hetaja miera nieabchodnaja dla źbieražeńnia asabliva kaštoŭnych pryrodnych resursaŭ.
«My nie nienaviśniki katoŭ, ale my chočam, kab naša pryroda i dalej mieła šmat dzikich formaŭ žyćcia», — skazaŭ jon miascovaj presie.
