Aŭstralijskaha karykaturysta Marka Najta, jaki namalavaŭ Sierenu Uiljams padčas skandalnaha matča ŭ finale US Open, abvinavačvajuć u rasiźmie i seksiźmie, ale jon śćviardžaje, što prosta adlustravaŭ ahidnyja pavodziny tenisistki.
Na malunku raźjušanaja Sierena skača nad złamanaj rakietkaj, a pobač lažyć dziciačaja soska (u chodzie kanfliktu z sudździoj na vyšcy Uiljams niekalki razoŭ paŭtaryła, što jana — maci).
Krynica: tvitar Marka Najta.
Šmatlikija krytyki Najta paličyli, što karykatura poŭnaja stereatypaŭ rasisckaha kštałtu. Kamuści taksama nie spadabałasia, što koler skury japonki Osaki na malunku śviatlejšy, čym jość nasamreč, i jana vyhladaje amal bialavaj.
Baćka Naomi — haicianin, i ŭ žyćci jana bolš smuhłaja, čym bolšaść japoncaŭ.
Karykatura Najta była apublikavanaja ŭ paniadziełak u samaj papularnaj aŭstralijskaj haziecie Herald Sun.
Namalavany na karykatury sudździa na vyšcy kaža japonskaj tenisistcy: «Moža, ty prosta dasi joj pieramahčy?»
I sam mastak, i redaktar vydańnia Dejman Džonstan nastojvajuć, što ničoha rasisckaha abo seksisckaha ŭ malunku niama, ale jon adlustroŭvaje niespartyŭnyja pavodziny Uiljams, jakaja źnievažała sudździu na vyšcy.
«Karykatura vyśmiejvaje ahidnyja pavodziny lehiendy tenisa. My ŭsie całkam padtrymlivajem Marka», — napisaŭ Džonstan u svaim tvitary.
Sacyjalnyja sietki, miž inšym, poŭnyja paviedamleńniaŭ aburanych karystalnikaŭ, siarod jakich i aŭtar knih pra Hary Potara Džaan Roŭlinh.
«Vam paśpiachova ŭdałosia źvieści adnu z najvialikšych spartsmienak sučasnaści da kamičnaha rasiscka-seksisckaha vobrazu i abiaźličyć druhuju vialikuju spartsmienku. Małajcy», — napisała Roŭlinh.
Niekatoryja paraŭnoŭvajuć karykaturu aŭstralijca z papularnymi ŭ minułym ździeklivymi malunkami afra-amierykancaŭ.
«Vy nie mahli być jašče bolšymi rasistami, navat kali b pastaralisia. A vy vielmi staralisia. Vializnyja vusny, padkreślena vialikija častki cieła, jakija namiakajuć na praźmiernuju mužnaść Siereny… U nastupny raz prosta vykarystoŭvajcie jakuju-niebudź karcinku 1800-ch hadoŭ. Nichto i nie zaŭvažyć roźnicy pamiž tym rasizmam i vašym», — kaža hety post.
Nacyjanalnaja asacyjacyja čarnaskurych žurnalistaŭ ZŠA zajaviła, što karykatura «ahidnaja ŭ roznych formach».
«Meta majoj karykatury — prosta adlustravać Sierenu ŭ momant isteryki. I bolš ničoha», — skazaŭ aŭtar karykatury ŭ intervju aŭstralijskaj teleradyjoviaščalnaj karparacyi ABC.
Jon taksama adkinuŭ śćvierdžańni, što nikoli nie staŭ by adlustroŭvać padobnym čynam mužčynu, i jak dokaz źmiaściŭ u tvitary karykaturu na aŭstralijskaha tenisista Nika Kirjosa, jaki taksama viadomy chamskimi vybrykami na korcie.
U aŭtorak dniom akaŭnty Marka Najta ŭ tvitary i fejsbuku byli zabłakavanymi.