Hazieta «Vo słavu Rodiny» apublikavała materyjał pra skandalnaha pałkoŭnika Aleha Lubočku, kiraŭnika Navukova-daśledčaha Instytuta Uzbrojenych sił, jaki niadaŭna adznačyŭsia adyjoznymi zajavami pra Ivana Žachlivaha i Alaksandra Suvorava.
Aleh Lubočka. Fota: https://vsr.mil.by
Čytajcie: Kiraŭnik Navukova-daśledčaha instytuta Uzbrojenych sił Biełarusi vykazaŭ zachapleńnie Ivanam Žachlivym i nazvaŭ Ajčynaj Rasiju CYTATY
U razmovie z žurnalistkaj vajennaj haziety Lubočka ni razu nie zhadaŭ svaich papiarednich kumiraŭ.
Naadvarot, asobnym abzacam havorka viadziecca pra pryjaznaść Lubočki da znakavych postaciaŭ biełaruskaj kultury.
«U maładyja hady, naroŭni z zamiežnymi piśmieńnikami-ramanistami, adnym z ulublonych aŭtaraŭ Aleha Mikałajeviča byŭ Uładzimir Karatkievič, vaśmitomnik jakoha na rodnaj movie zaachvociŭ da vyvučeńnia biełaruskaj historyi.
Zachlobvajučysia jon čytaŭ vajennuju prozu Vasila Bykava, jaki staviŭ svaich hierojaŭ u ekstremalnyja ŭmovy maralnaha vybaru, kali addanaść dadzienaj adnojčy prysiazie sparadžała hreblivaść da voraha.
Byli i inšyja aŭtary: Jakub Kołas, Hienrych Dalidovič, Ivan Mielež», — piša «Vo słavu Rodiny».
Taksama adznačajecca, što «u svaje 50 hod pałkoŭnik zvalniajecca z vajennaj słužby, pakidajučy hodny ŭniosak u dalejšaje budaŭnictva sistemy vajennaj navuki».
Možna mierkavavać, što
zvalnieńnie Lubočki źviazanaje z uzrostam, bo va Uzbrojenych siłach isnuje tradycyja abo pavyšać čałavieka ŭ zvańni paśla 50 hod, abo adpraŭlać na piensiju.
Praŭda, byvajuć i vyklučeńni.
Krynicy «Našaj Nivy» vykazvajuć zdahadku, što toj biełarusafobski artykuł Lubočka napisaŭ dla taho, «kab my mahli puścić pył u vočy ruskim».
***
Lubočka Aleh Mikałajevič uznačalvaje navukova-daśledčy Instytut uzbrojenych sił z kanca 2014 hoda, kandydat vajennych navuk.
Skončyŭ Taškienckuju vyšejšuju tankavuju vučelniu ŭ 1989 hodzie, paśla prachodziŭ słužbu ŭ Paŭnočna-Kaŭkazskaj vajennaj akruzie. Z 1992 hoda — va Uzbrojenych siłach Biełarusi, u 2000 hodzie skončyŭ kamandna-štabny fakultet Vajennaj akademii, u 2008 hodzie — fakultet Hienštaba Vajennaj akademii Biełarusi. Z 2000 hoda pracuje na navukovych pasadach.
Taksama ličycca adnym z pryznanych ekśpiertaŭ u kinałohii.
Źjaŭlajecca redaktaram vydańnia «Navuka i vajennaja biaśpieka», dadatku da časopisa «Armija».
