U Śvietłahorsku rabotniki kamunalnaha pradpryjemstva «Śvietač» natrapili, jak jany paličyli, na bojeprypas časoŭ Druhoj suśvietnaj vajny, paviedamlaje «Ranak».
«Minu» vyjavili ŭ chodzie praviadzieńnia ziemlanych rabot pa prakładcy vodapravoda kala 15.00. Pamylicca było lohka — pradmiet tyrčaŭ ź ziamli tolki častkova i vizualna nahadvaŭ niešta vybuchaniebiaśpiečnaje.
Vyklikali milicyju. Na miescy zastaŭsia supracoŭnik RAUS, jaki achoŭvaŭ terytoryju da pryjezdu sapiorna-piratechničnaj hrupy vajskovaj čaści 5527.
Sapiory dastali «snarad» ź ziamli i ŭžo tady identyfikavali znachodku jak kisłarodny bałon časoŭ vajny. Taksama ŭ hetym miescy była znojdziena prabitaja kulaj kaska.
Śpiecyjalisty prajšlisia pa prylehłaj terytoryi ź mietałašukalnikam, adnak ničoha niebiaśpiečnaha nie znajšli.