Uładzimir Pucin hatovy całkam finansavać zbudavańnie hazapravoda «Paŭnočny patok — 2» za košt Rasii ŭ tym vypadku, kali ZŠA ŭviaduć sankcyi suprać udzielnikaŭ kansorcyuma, jakija realizujuć hety prajekt, paviedamlaje DW.
Fota: Wikimedia Commons.
Pucin prainfarmavaŭ ab hetych płanach urad Niamieččyny padčas vizitu ŭ Mieziebierh 18 žniŭnia, dzie jon sustrakaŭsia z kancleram Anhiełaj Mierkiel (Angela Merkel), paviedamlaje ŭ subotu, 22 vieraśnia, hazieta Süddeutsche Zeitung sa spasyłkaj na infarmavanyja krynicy.
Ciapier budaŭnictva «Paŭnočnaha patoku — 2» ažyćciaŭlajecca mižnarodnym kansorcyumam, u jakim 50% naležać rasijskamu «Hazpromu». Siarod udzielnikaŭ kansorcyuma — dačka BASF Wintershall, Uniper i Shell. ZŠA, adnak, užo nieadnarazova pahražali ŭvieści sankcyi suprać enierhietyčnaha siektara Rasii ŭ pakarańnie za mierkavanaje ŭmiašańnie Maskvy ŭ prezidenckuju kampaniju ŭ ZŠA ŭ 2016 hodzie. Ad hetych sankcyj mohuć paciarpieć i zachodnija partniory Rasii.
Płany Pucina pa 100-adsotkavamu finansavańniu «Paŭnočnaha patoku — 2, adnak, mohuć natknucca na surjoznyja pieraškody ŭ Jeŭrakamisii, pakolki, zhodna z praviłami kankurencyi ŭ ES, vytvorca i pastaŭščyk enierharesursaŭ nie mohuć być adnoj asobaj.
Uładzimir Pucin, jaki zaŭsiody ź nierazumieńniem staviŭsia da hetych dyrektyŭ ES, taksama ź niezadavolenaściu naziraje za tym, jak Hiermanija, jakaja raniej nie admaŭlałasia ad biznesu z Rasijaj u hazavaj śfiery, ciapier niečakana farsiruje budaŭnictva terminała pa pryjomie zvadkavanaha hazu, kudy, mahčyma, budzie dastaŭlacca paliva z ZŠA, adznačaje Süddeutsche Zeitung.
