Alaksandr Łukašenka 13 listapada pravioŭ kadravy dzień. Pra niekatorych z novych postaciaŭ možna pačytać u našym materyjale.
Z Damaska — u Budapiešt
Alaksandr Panamaroŭ. Fota facebook.com.
Nie taki ŭžo i časty vypadak. Alaksandr Panamaroŭ ad 2014 hoda pracavaŭ pasłom Biełarusi ŭ haračaj Siryi. Zvyčajna ŭ takich vypadkach dypłamataŭ viartajuć nazad na radzimu, a ŭžo praź niejki čas vypisvajuć novuju zamiežnuju kamandziroŭku. Panamaroŭ ža adrazu pryznačany pasłom u Vienhryi.
Alaksandru Panamarovu 43 hady, jon minčuk. Vučyŭsia ŭ Akademii kiravańnia (1996). Adrazu pa skančeńni VNU trapiŭ u MZS. Pracavaŭ tam va ŭpraŭleńni mižnarodnaj biaśpieki i kantroli nad uzbrajeńniami.
Pieršuju zamiežnuju misiju Panamarovu davieryli ŭ 2007 hodzie, kali jon źjechaŭ daradcam pradstaŭnika Biełarusi ŭ AAN u Ženievie. Pa viartańni znoŭ pracavaŭ u tym samym upraŭleńni mižnarodnaj biaśpieki pry MZS. Apošnim miescam pracy była Siryja.
Lohkaj pracu ŭ Siryi nijak nie nazavieš: u krainie viadziecca hramadzianskaja vajna, u jakuju ŭciahnutyja mnohija krainy śvietu. U 2016, kali armija Asada vyzvaliła pryharady Damaska, Panamaroŭ napisaŭ na svajoj staroncy ŭ fejsbuku: «Vialikaja palohka dla ŭsich, chto doŭhija šeść hadoŭ žyŭ u stalicy pad pahrozaj abstrełaŭ». Mabyć, mieŭ na ŭvazie i siabie.
Arciom Panamaroŭ u Siryi. Fota vk.com.
Admietna, što častku dopisaŭ u sacsietkach Panamaroŭ robić pa-biełarusku. U dypłamata dvoje synoŭ — Uładzimir i Arciom. Małodšy Arciom vystaŭlaje ŭ svaim akaŭncie Ukantakcie šmat zdymkaŭ ź siryjskich haradoŭ.
Syn namieśnika kiraŭnika Administracyi
A voś novym pasłom Biełarusi ŭ Siryi staŭ Juryj Słuka. Da apošniaha času jon uznačalvaŭ słužbu dziaržaŭnaha pratakołu pry MZS.
Juryj — syn viadomaha biełaruskaha čynoŭnika i vykładčyka Aleha Słuki. Naprykancy isnavańnia SSSR Aleh Słuka źjaŭlaŭsia dekanam fakulteta žurnalistyki BDU. U 1995 staŭ pracavać namieśnikam kiraŭnika Administracyi prezidenta. Ad 1997 byŭ namieśnikam ministra adukacyi.
U MZS Słuka byŭ namieśnikam načalnika konsulskaha ŭpraŭleńnia. Paźniej — konsułam Biełarusi va Ukrainie. Ciapier u jaho pieršaja samastojnaja misija.
U Ministerstvie kultury baletmajstar zamiest ideołaha
Natalla Karčeŭskaja z Kanstancinam Michalenkam. Fota facebook.com.
My ŭžo pisali, što skandalnaja Iryna Dryha pakinuła pasadu pieršaha namieśnika ministra kultury. Jaje miesca zaniała Natalla Karčeŭskaja.
Spadaryni Natalli 44 hady, jana rodam ź Minska. Skončyła Instytut kultury, kandydat mastactvaznaŭstva. U rodnym univiersitecie jana i pracavała. Apošnim časam źjaŭlałasia pieršym prarektaram. Da hetaha pracavała dekanam fakulteta tradycyjnaj biełaruskaj kultury i sučasnaha mastactva. Navukovyja intaresy — historyja i teoryja chareahrafičnaha mastactva.
Karčeŭskaja źjaŭlajecca chareohrafam u mnohich śpiektaklach Kupałaŭskaha teatra. Naprykład, u «Dźviuch dušach», «Miestačkovym kabare», «Listapad. Andersien».
Syn Alaksiej padpisany ŭ sacyjalnych sietkach pa-biełarusku. Jon vučycca ŭ Akademii muzyki. Ciapier jana ŭ stasunkach z akcioram Kanstancinam Michalenkam, jon maładziejšy za jaje. U pary jość syn Fiodar.
Kanstancin Michalenka pościć u sacyjalnych sietkach takija vieršy: «Ci płaču ja, ci piaju, // Ci razmaŭlaju z matulaju — // Pieśniu svaju, movu svaju // Ja da hrudziej prytulvaju».
Try pasady za try miesiacy, praź Minsk u Pinsk
Ivan Rabkaviec. Fota «Miedyja-Paleśsie».
Staršynioj Pinskaha rajvykankama staŭ Ivan Rabkaviec. Pry hetym jon zastajecca deputatam Pałaty pradstaŭnikoŭ. Na parłamienckich vybarach 2016 hoda jaho zrabili pieramožcam pa Pinskaj sielskaj akruzie z vynikam 77,1%.
Da svajho abrańnia ŭ parłamient Rabkaviec doŭhi čas zajmaŭ pasadu dyrektara Pinskaha aŭtobusnaha parka. A litaralna 31 žniŭnia 2018 hoda Rabkaŭca pastavili namieśnikam ministra transpartu. Vychodzić, što na hetaj pasadzie jon prabyŭ usiaho 2,5 miesiaca. A ciaham apošnich troch miesiacaŭ pabyŭ u troch roznych kresłach.
Rabkaŭcu 43 hady, jon rodam z Łuninca. Skončyŭ Paleski dziaržaŭny ŭniviersitet. Haduje dźviuch dačok.
Novyja pieršyja namieśniki ŭ ekanomicy i finansach
Alaksandr Čarviakoŭ. Fota z sajta Ministerstva ekanomiki.
Alaksandr Čarviakoŭ staŭ pieršym namieśnikam ministra ekanomiki. Jamu 52 hady, a rodam z Babiničaŭ Aršanskaha rajona. Vučyŭsia ŭ sielskahaspadarčaj akademii ŭ Horkach. Da 2010 hoda źjaŭlaŭsia vykładčykam u svajoj alma-matar.
U 2010 uznačaliŭ Navukova-daśledčycki ekanamičny instytut Ministerstva ekanomiki. U 2017 staŭ namieśnikam ministra. Čarviakoŭ, jak i bolšaść ciapierašnich supracoŭnikaŭ Minekanomiki, maje reputacyju rynačnika. Pry hetym jon šmat supracoŭničaje ź niezaležnymi ekanamičnymi centrami.
Juryj Sielivierstaŭ usio žyćcio adpracavaŭ u Ministerstvie finansaŭ. Fota belta.by.
Juryj Sielivierstaŭ zaniaŭ kresła pieršaha namieśnika ministra finansaŭ. Jamu 40 hadoŭ, jon minčuk. Vučyŭsia ŭ Narhasie i Akademii kiravańnia. Adrazu paśla vučoby trapiŭ na pracu ŭ Ministerstva finansaŭ. Uznačalvaŭ upraŭleńnie biudžetnaj palityki viedamstva. A 2015 — namieśnik ministra.
