Izrailski ministr abarony Avihdor Libierman zajaviŭ ab tym, što jon sychodzić z kansiervatyŭnaha kaalicyjnaha ŭrada premjer-ministra Bińjamina Nietańjachu. Svaju adstaŭku jon patłumačyŭ «pratestam suprać pieramirja ŭ Hazie», pieradaje Reuters. Rašeńnie Libierman ahučyŭ na śpiecyjalnaj pres-kanfierencyi.
«Ja tut, kab abviaścić pra svaju adstaŭku ŭ jakaści ministra abarony Izraila», — skazaŭ kiraŭnik viedamstva.
Napiaredadni jon vystupiŭ suprać damovy ŭrada Izraila z paleścinskim isłamisckim rucham CHAMAS ab spynieńni bajavych dziejańniaŭ u siektary Haza. Padobnyja dziejańni jon nazvaŭ «kapitulacyjaj pierad teroram». «Inšych słoŭ dla hetaha niama. My kuplajem karotkaterminovy spakoj dla doŭhaterminovaj škody biaśpiecy», — padkreśliŭ ministr.
Paśla abviaščeńnia ab svaim sychodzie Libierman, jak pieradaje Times of Israel, zaklikaŭ miascovyja ŭłady raspuścić urad i pravieści ŭ krainie novyja vybary.