Niadaŭna vakoł pomnika «usiesajuznamu starastu» Michaiłu Kalininu źjaviłasia dziŭnaja aharodža, jakuju minčuki ŭžo paśpieli achryścić «parnikom». Vyśvietliłasia, što heta pačałasia rekanstrukcyja pomnika.
Fota - Alaksandar Chanin
Na sajcie dziaržzakupak možna znajści tendary na rekanstrukcyju pomnika. Akazvajecca, adnaŭleńnie savieckaha idała kaštuje 134 tysiačy biełaruskich rubloŭ. Pa siońniašnim kursie heta kala 62 tysiač dalaraŭ.
Praŭda, abodva tendary skončylisia niaŭdała. Ale vyśvietlić, chto ŭ vyniku zajmajecca restaŭracyjaj i čamu jana kaštuje tak šmat, nie atrymałasia. U pradpryjemstvie «Remaŭtador Pieršamajskaha rajona», jakoje adkazvaje za rekanstrukcyju na pytańni adkazvać kateharyčna admovilisia.
«Naša Niva» pacikaviłasia ŭ Antona Astapoviča, staršyni Tavarystva achovy pomnikaŭ, ci viedaje jon štości pra hetuju restaŭracyju.
«Dva hady tamu ja byŭ siarod udzielnikaŭ prajekta ab restaŭracyi pomnika, rabiŭ histaryčnuju daviedku, — paviedamiŭ Astapovič. — Ale navukovy kiraŭnik prajektu maje prapanovy pa reinterpretacyi pomnika adchiliŭ — ja prapanoŭvaŭ dadać šyldu, što Kalinin mieŭ dačynieńnie da masavych palityčnych represij.
Što tyčycca košta restaŭracyi, to, na žal, tut ja nie vialiki śpiecyjalist. Ale košt budzie vialiki, bo idzie całkam rekanstrukcyja, pačynajučy ad pastamienta. Sam pomnik ź miednaha spłavu, na stykach stalnaja armatura — iduć chimičnyja pracesy.
Hety Kalinin faktyčna zhniŭ. Restaŭracyja takich rečaŭ vielmi i vielmi darahaja. Metazhodnaść takoj restaŭracyi — pytańnie inšaje.
Mahu dadać tolki, što stavili pomnik u kancy 1970-ch. Košt vyrabu, mantažu i dobraŭparadkavańnie terytoryi vakoł kaštavała bolš za 280 tysiač savieckich rubloŭ. Dla paraŭnańnia: u toj čas kala 6 tysiač kaštavała trochpakajoŭka u Minsku».
