Na jutubie źjaviŭsia novy kanał videahutarak «Barancava. Intervju». Jaho viadučaja — supracoŭnica radyjo «Humar FM» Anastasija Barancava.
Anastasija Barancava, fota z fejsbuka
Pakul jana apublikavała dźvie hutarki — ź biznesmienami Arkadziem Izrailevičam i Viktaram Prakapieniem.
Adzin ź cikavych momantaŭ razmovy z Prakapieniem datyčyŭsia imaviernaha abjadnańnia Biełarusi i Rasii.
Pytańnie ŭźnikła paśla adkazu Prakapieni pra toje, jakoj kolkaściu nieruchomaści vałodaje jahonaja kampanija ŭ Minsku.
Pryvodzim stenahramu:
Viadučaja: […] U vas nie było takich dumak, što niekali naša kraina raptam abjadnajecca ź jakoj-niebudź inšaj krainaj? I tady toj, chto vałodaje nieruchomaściu, moža prosta ŭžo nie pracavać da kanca svajho žyćcia. Nie było ŭ vas takich dumak?
Prakapienia: Ja vam skažu, pieršaje: što nikoli našaja kraina nie ŭvojdzie ŭ skład inšaj krainy. Prynamsi, pakul u nas ciapierašni prezident. Heta raz. Dva: što datyčyć taho, kali «raptam» našaja kraina ŭvojdzie ŭ skład inšaj krainy, toj krainy, pra jakuju vy dumajecie, — Rasiju.
Viadučaja: Pra Rasiju.
Prakapienia: Tak, pra Rasiju.
Viadučaja: Chaciełasia b, kaniečnie.
Prakapienia: To hetaja nieruchomaść nie budzie kaštavać ničoha. Tamu što…
Viadučaja: Čamu?
Prakapienia: Hlańcie, što adbyłasia ŭ Krymie: Krym na siońnia staŭ takoj čarnobylskaj zonaj. Krymčuki nie mohuć pierasoŭvacca narmalna — im nie dajuć vizy. Na ludziej, jakija inviestujuć u Krym, nakładvajuć sankcyi. Tudy suśvietnaja supolnaść [nie idzie]… Sistema mižnarodnaha prava tak uładkavana, što zachapić častku čužoj krainy abo tam jana ŭvojdzie ŭ skład…
Viadučaja: My ž nie kažam pra zachop, my kažam dobraachvotnaje abjadnańnie. Jaki zachop?
Prakapienia: Nichto takoje «dobraachvotnaje» abjadnańnie nie pryznaje.
Viadučaja: Vy zabyvajecie, što ŭ Krymie prajšoŭ refierendum.
Prakapienia: Biezumoŭna. Refierendum, jaki Biełaruś nie pryznała.
Viadučaja: Biełaruś u hetym dačynieńni vydatnaja: nie pryznali, ale pry hetym jany i nie za, i nie suprać.
Prakapienia: Biełaruś nie pryznała refierendum. Taki scenar pryviadzie da taho, što kožnamu biełarusu stanie žyć našmat horaj. Taki scenar pryviadzie da taho, što ŭsia hetaja terytoryja budzie pad sankcyjami i inviestavać siudy budzie niemahčyma. Ničoha dobraha ŭ takim scenary nie budzie.
Viadučaja: Ja ž nie toje što… Ja, naprykład, nie za…
Prakapienia: Nu vy ž havorycie…
Viadučaja: Ale prezident skazaŭ… [dalej cytujecca frahmient vystupu Łukašenki].
Prakapienia: Zadača kožnaha zrabić maksimalna, što ad jaho zaležyć, kab prynosić bolšuju karyść, stvarać bolšuju kolkaść ekanamičnych kaštoŭnaściaŭ, kab našaja kraina była bolš niezaležnaj. I znoŭ ža, kali takoje adbudziecca, to biełaruskaja nieruchomaść nie budzie kaštavać ničoha, bo jana nie budzie patrebna nikomu.
Viadučaja: Kali adbudziecca zachop? Vy heta majecie na ŭvazie?
Prakapienia: Kali adbudziecca luboha kštałtu abjadnańnie, jakoje nie budzie pryznana suśvietnaj supolnaściu.
***
U razmovie z «Našaj Nivaj» Barancava zapeŭniła, što nasamreč kazała, što joj «nie chaciełasia b».
«Tam mahło pačucca, sapraŭdy. Ja nasamreč skazała, što mnie nie chaciełasia. Ja ŭvohule dumaju, što dobry intervjujer — toj, jaki nie kamientuje i tolki pytaje», — skazała viadučaja.