WATCH DOCS Belarus tradycyjna ŭtulna ŭładkoŭvajecca ŭ ščylnaj śniežańskaj afišy. 13—16 śniežnia minčanie i hości stalicy buduć mieć mahčymaść pabačyć nie tolki najmacniejšyja dakumientalnyja filmy pra pravy čałavieka, ale i parazmaŭlać z režysiorami filmaŭ i inšymi haściami fiestyvalu. A jašče možna budzie skłaści žartaŭlivy rejtynh samych biazdumnych rašeńniaŭ čynoŭnikaŭ za apošni hod. U prahramie fiestyvala 15 kinastužak, jakija pakažuć u kinateatry «Mir» i na placoŭkach OK16, PR3.
Fiestyval, jaki źjaviŭsia z metaj havaryć pra pravy čałavieka na movie asabistych i aŭtarskich historyj, pradstaŭlaje filmy z roznych kutkoŭ śvietu. Hierojeŭ kinastužak — sapiora-dabraachaotnika z paślavajennaha Iraku, źniavolennych žančyn biełaruskaj turmy, šviedskuju rep-śpiavačku Silvanu, vuličnych muzykaŭ Burkina-Faso i Nobieleŭskaha łaureata premii mira — abjadnoŭvaje słohan fiestyvala «Stajać na svaim». Moc i słabaść takoj pazicyi fiestyval prapanoŭvaje «razhladzieć» jak na samich kinaprahladach, tak i padčas śpiecyjalnych mierapryjemstvaŭ z udziełam ekśpiertaŭ.
«Prava na čałaviečuju hodnaść — heta ŭ tym liku imknieńnie adstajać svajo «Ja». Adnak abarona svaich pierakanańniaŭ, pravoŭ i miežaŭ — tema adviečnaha pošuku bałansa ŭ śviecie čałaviečych adnosinaŭ. Na jakoj mienavita praŭdzie «stajać», kožny vybiraje sam pa pryčynie samych roznych abstavinaŭ, ale navučycca ŭ hetaj baraćbie pavažać i čuć inšych — adna z zadač našaha fiestyvala. My zaprašajem da ŭdziełu ludziej z roznymi pazicyjami i, mahčyma, my zdajemsia adzin adnamu apanientami tolki tamu, što nikoli nie mieli mahčymaści pahavaryć,» — kaža dyrektar fiestyvala Taćciana Javorskaja.
Tema fiestyvala raskryvacca praź niekalki rakursaŭ:
Stajac na svaim: Nievuctva i ksienafobija
13 śniežnia ŭ 18:30 u kinateatry «Mir» fiestyval adkryje film «Bieły śviet vačyma Daliboreka» — redki i vielmi paśpiachovy prykład dakumientalnaj kamiedyi. Češski režysior Vit Kłusak adpraŭlaje hledača ŭ zamknutaje koła rozdumaŭ pra toje, jakim žudasnym moža być nacyzm u svajoj žyvučaści, i jaki nacyzm śmiešny, kali pabačyć realnaje žyćcio tych, u čyi hałovy jon prakradajecca.
Stajać na svaim: Chłuśnia, nachabnaja chłuśnia
Na asnovie filma Maksima Pazdaroŭkina «Naš novy prezidient» adbudziecca dyskusija pra fejki ŭ ŚMI, postpraŭdu, prapahandu i pra infarmacyju, jakaja robić nas jašče bolš uraźlivymi. Partnior i miesca praviadzieńnia prahladu - Press Club Belarus.
Stajac na svaim: Hleba, jakoj niama pad nahami
Tut kamanda WATCH DOCS prapanoŭvaje adrazu try nahody pahavaryć adkryta:
— resacyjalizacyja byłych asudžanych. Razmaŭlajem spačatku z ekśpiertami paśla prahladu filma «Unutranaja rabota», zatym razam z režysioram Anastasijaj Mirašničenka i hierainiami filma «Debiut»(pra žanočuju homielskuju kałoniju);
— emacyjnaje vyharańnie, depresija, sindrom chraničnaj stomlenaści: kali ŭžo čas źviarnucca za dapamohaj? Havorym z ekśpiertami paśla filma Dženifier Briea «Niespakoj»;
— intehracyja ludziej sa słabym słycham; čamu my nie razam? Dakumientalnaja historyja «Hłuchoje dzicia» praciahniecca dyskusijaj z ekśpiertami.
Stajac na svaim: Zachoŭvajučy zdarovy sens
Hetaj temaj abjadnanyja filmy, jakija dapamohuć vam pabačyć, što našaja płanieta i siońnia ŭsypanaja plamami žachu, padobnaha na Chałakost i, nažal, navat strašniejšaha. Siarod samych uražvajučych filmaŭ WATCH DOCS 2018: stužki «Mužčyna, jaki ramantuje žančyn» historyja pra vajnu, u jakoj žančyny stanoviacca zbrojaj i polem boju, i «Trap u budučyniu» — sučasnaja adysieja pra vyratavańnie tapielcaŭ u mory paśpiachovaj abyjakavaści. Z režysioram apošniaha filma, Rene Chejzkampam, hledačy abmiarkujuć adnosiny jeŭrapiejcaŭ i biełarusaŭ.
Śpiecyjalnyja hosci fiestyvalu:
- Adam Michnik — polski hramadski dziejač, dysident, žurnalist, pakazalnaja asoba ŭ polskaj palityčnaj apazicyi 1968—1989 hadoŭ, adzin ź lidaraŭ prafsajuza «Salidarnaść». Zasnavalnik i hłaŭny redaktar «Haziety Vyborčaj». Razam ź im na sustreču z hledačami pryjedzie režysior filma pra Adama Michnika Maryja Zmaž-Kačanovič.
- Łoŭrens MakKioun, były dobraachvotnik IRA, za što ŭ 1997 hodzie byŭ asudžany da pažyćciovaha źniavoleńnia (pamiłavany ŭ 1992), udzielnik «Koŭdravaha» i «Brudnaha» pratestaŭ, haładoŭki 1981 hoda. Zaraz irłandski piśmieńnik, dramaturh, scenaryst. Hałoŭnaja tema jaho prac — asensavańnie kanfliktu ŭ Paŭnočnaj Irłandyi.
Hladzim razam filmy «Murejd Fereł: niaskončanaja razmova» i «Michnik: Budź realistam, patrabuj niemahčymaha!» i razmaŭlajem ź imi pra imknieńnie viarnuć sabie toje, što pavinna naležać tabie ci tvajmu narodu pa pravu naradžeńnia i pra pačućcio abaviazku, jakoje stanovicca asabistym «kryžam».
Usie filmy tranślujucca z subtytrami (na ruskaj ci biełaruskaj movie), tamu dasiažnyja dla ludziej z abmiežavańniami słychu.
Pravaabarončaja navinka 2018 hoda — antypremija «WATCH DOCS paznačyŭ»
Da 10 śniežnia arhanizatary fiestyvala źbirajuć naminantaŭ, jakija źniervavali i zasmucili biełarusaŭ na praciahu hoda. Daviedacca pra krytery i pakinuć svaju prapanovu možna na sajcie WATCH DOCS. Kamanda fiestyvala sfarmuje śpis pretendentaŭ, a hledačam možna budzie prahałasavać za šort-list padčas prahladaŭ kino. Pieramožcy buduć abvieščany padčas uračystaha zakryćcia fiestyvala.
Uvachod na ŭsie padziei ŭ miežach WATCH DOCS Belarus tradycyjna i pryncypova svabodny (dla fundataraŭ fiestyvala arhanizatary reziervujuć miescy). Płjacoŭki fiestyvala: kinoteatr «MIR«, kulturny chab OK16 i PR3. Bolš pra prahramu tut.
JAK PADTRYMAĆ FIESTYVAL:
— praz kraŭdfandynhavuju płatformu Talaka.by — paabiacać płaciež;
— vypić kubačak kavy ŭ sietcy kaviarniaŭ-partnioraŭ akcyi WATCH DOCS Kava;
— zamović kavu z dastaŭkaj u partnioraŭ fiestyvalu
Ci… stancie častkaj kamandy!
«Hrukajciesia« da arhanizataraŭ u socsietkach i padpisvajciesia na naviny fiestyvalu — cikavaha budzie šmat!
Facebook.com/watchdocsbelarus
Vk.com/watchdocs_belarus
Instagram.com/watchdocs_belarus
watchdocs.by
