Vybary ŭ Chryścijanska-demakratyčnym sajuzie skončylisia pieramohaj 56-hadovaj Anehret Kramp-Karenbaŭer. Jana ŭznačalić partyju, a praz try hady maje stać kandydatkaj ad partyi ŭ kanclery Niamieččyny.
Raniej jana kiravała zachodniaj ziamloj Saar i tolki niadaŭna pierajechała ŭ Bierlin. «Tak, ja viedaju, što majo proźvišča ciažka vymavić», — žartuje jana. Niamieckaja presa nazyvaje jaje prosta: AKK.
Mierkiel była dačkoj pratestanckaha pastara, Kramp-Karenbaŭer — katalička. Pa pohladach jana blizkaja da Mierkiel — jak u ekanomicy, tak i ŭ maralnych pytańniach, a taksama ŭ pohladach na Jeŭrapiejski Sajuz i rolu Hiermanii ŭ śviecie. Jaje ličać zdolnaj da pošuku kampramisaŭ. U Saary jana kiravała ŭ kaalicyi ź Zialonymi i libierałami.
Mierkiel prasłaviłasia svajoj zdatnaściu kiravać bieskanfliktna i prysłuchoŭvacca da roznych siłaŭ. Padčas doŭhaha kiravańnia Mierkiel Niamieččyna stała biezumoŭnaj lidarkaj Jeŭrasajuza, a Jeŭrasajuz upieršyniu staŭ usprymacca jak suśvietny centr siły. ES udałosia istotna padniać ekanamičny patencyjał i dabrabyt novych členaŭ na ŭschodzie Jeŭropy. Uzrovień žyćcia ŭ Polščy, Bałtyi, Słavaččynie nabliziŭsia da siaredniejeŭrapiejskaha, choć heta vyklikała narakańni ŭ krainach «staroj Jeŭropy», bo biznes masava pieranosiŭ vytvorčaść na ŭschod.
Na źjeździe CHDS Kramp-Karenbaŭer atrymała 517 hałasoŭ z 999 u druhim tury vybaraŭ.
Novaja kiraŭnica chryścijanskich demakrataŭ viadomaja jak valavy palityk. U Saary jana spačatku ŭznačalvała Ministerstva ŭnutranych spraŭ. Adznačyłasia jana i ćviordaj linijaj u adnosinach da kahebisckaha režymu Pucina. Paśla napadu na ŭkrainskija karabli ŭ Kierčanskaj pratocy jana prapanavała zabłakavać jeŭrapiejskija porty dla rasijskaha fłota.
Drukujecca ŭ miežach śpiecyjalnaj rubryki «Naviny Hiermanii»
