Politanalitika: Heta nie ataka na suvierenitet, heta jon i jość
Vydańnie ličyć, što Maskva bolš nie maje namieru prosta tak spansiravać Minsk, jaki dziakujučy dvum z pałovaj dziesiacihodździam rasijskich šmatmiljardnych ulivańniaŭ, subsidyj i lhot usiu historyju niezaležnaści vyrašaje adrazu niekalki zadač.
Pa-pieršaje, rasijskaje sponsarstva zabiaśpiečvaje stabilnaść biełaruskaj sacyjalna-ekanamičnaj i palityčnaj sistem.
Pa-druhoje, heta dazvalaje Alaksandru Łukašenku pazicyjanavać siabie jak kiraŭnika suvierennaj dziaržavy, jakaja samastojna vyznačaje svaju palityku i nijakija źniešnija siły joj nie ŭkaz.
Adnak apošni hod Maskva stała niedvuchsensoŭna nahadvać, što mienavita jana apłačvaje hety «bankiet».
Rasija hatova zachavać padtrymku Minska, ale ŭ abmien choča atrymać patrebny Maskvie ŭzrovień intehracyi i ijerarchii, u pryvatnaści ŭ śfiery ahulnaha rynku, adzinych taryfaŭ i paradku cenaŭtvareńnia.
Vydańnie ŭpeŭniena, što ŭpartaje stajańnie na svaim i admova ad rasijskich prapanoŭ niasie pahrozu chutka abvalić ekanomiku i sacyjalnuju śfieru Biełarusi, što paŭpłyvaje na palityčny łandšaft krainy.
«Ale heta i jość realnaść sapraŭdnaha suvierenitetu — kali prychodzicca rabić surovy vybar z adnolkava nieprymalnych dla ciabie rašeńniaŭ, a nie toj ciapličny inkubatar, u jakim znachodziłasia biełaruskaja dziaržaŭnaść dziakujučy Rasii čverć stahodździa»,
piša «Politanalitika».
Rieportior: Infarmacyja pra zakrytuju sakretnuju naradu — demanstratyŭny demarš u bok Maskvy
Vydańnie prakamientavała infarmacyju ad krynic «Našaj Nivy» ab praviedzienym zakrytym sakretnym schodzie z udziełam Łukašenki, na jakim nibyta abdyvałasia vypracoŭka stratehii pa supraćstajańni cisku Rasii.
«Rieportior» ličyć, što «sakretnaja narada ŭ viarchach» — demanstratyŭny demarš u adras Maskvy z nastupnaj dobra spłanavanaj «uciečkaj infarmacyi».
Vydańnie ličyć, što heta nie samy drenny varyjant dla Rasii.
«Kali Minsk i sapraŭdy pryniaŭ rašeńnie ab «supraćstajańni» Rasii, heta budzie aznačać tolki adno: ułada Biełarusi vybrała dla siabie kryvuju darožku, pa jakoj u svoj čas pajšoŭ Viktar Janukovič. Žadajučych dapamahčy ŭ takoha rodu «baraćbie» znojdziecca dastatkova. Možna nie sumniavacca, što piačeńki dla minskaha «majdana» daŭno padrychtavany i tolki čakajuć svajoj pary»,
— piša «Rieportior».
Snob: Minsku viartajecca nazad bumieranh, jaki zapuścili 20 hadoŭ tamu
Ilja Milštejn u svajoj kałoncy piša, što Łukašenka 20 hadoŭ tamu maryŭ pra toje, kab stać prezidentam Sajuznaj dziaržavy. Siońnia jon maryć ab tym, kab u Maskvie raz i nazaŭsiody zabylisia pra hetuju niaŭdałuju dziaržavu.
Jon ličyć, što na Łukašenku zrabiła asabliva vialikaje ŭražańnie rasijskaja ahresija ŭ Hruzii i Ukrainie. Jon adrazu zrazumieŭ, što Biełaruś moža stać nastupnaj sakralnaj achviaraj «ruskaha śvietu».
Chto suprać? Kałumnist «Snoba» piša, što Łukašenka i tyja biełarusy, jakija adčuvajuć siabie hramadzianami niezaležnaj dziaržavy:
«Biełarusy, jakich jon hnabić dziesiacihodździami. Da ich, bratoŭ i siaścior, jon i źviartaŭsia ciapier, kali pravodziŭ zakrytuju naradu z kiraŭnictvam, jakaja była pryśviečana zachavańniu niezaležnaści «va ŭmovach cisku z rasijskaha boku». Arhanizujučy źliŭ i dzielačysia sakretam z cełym śvietam, jon užo asobna paviedamiŭ ab tym, što jaho radzimu susiedzi źbirajucca «ŭpichnuć u Rasiju» i padzialić na vobłaści»,
— piša «Snob».
Milštejn upeŭnieny, što havorka idzie pra bumieranh, jaki praz dva ź lišnim dziesiacihodździ prylataje z Maskvy.
Viesti.FM: Niamieččyna maje namier umiašacca ŭ sprečku Biełarusi i Rasii
U ramkach radyjoprahramy «Formuła sensu» na «Viesti FM» namieśnik kiraŭnika «Rady pa źniešniaj i abaronnaj palitycy» (NDA, blizkaja da rasijskaha MZS) Dźmitryj Susłaŭ źviarnuŭ uvahu na toje, što zaraz nibyta Minsk trapiŭ u pole zroku niamieckaj palityčnaj elity.
Paśla naviedvańnia šerahu kanfierencyj u Jeŭropie palitołah pryjšoŭ da vysnovy, što Rasija moža atrymać novuju arenu rasijska-zachodniaha sutyknieńnia na postsavieckaj prastory.
Tak, pa vynikach naviedvańnia Bierlina ekśpiert pryjšoŭ da vysnovy, što padobnaja hatoŭnaść palitykaŭ Hiermanii šle tryvožny sihnał Rasii adnosna Biełarusi.
«Jany majuć namier niejak umiašacca ŭ tuju sprečku, jakaja skłałasia ŭ rasijska-biełaruskich adnosinach», — rastłumačyŭ Susłaŭ, a zatym dadaŭ, što Zachad «bačyć šaniec u niejkaj pieraaryjentacyi palityki Biełarusi ŭ zachodnim kirunku, i hatovy na hetym zhulać».
Rosbałt: Rasija choča stvaryć adzinuju dziaržavu, u jakoj biełarusaŭ asimilavać nieabaviazkova. Meta važniejšaja za kaštoŭnaści
Kałumnist «Rosbałta» Dźmitryj Travin ličyć, što varyjant abjadnańnia Biełarusi i Rasii nie źjaŭlajecca fantastyčnym, pakolki hałoŭnaja meta rasijskich uładaŭ — rašeńnie prablemy-2024 dla Pucina, što možna zrabić, stvaryŭšy novuju dziaržavu.
Pryčym Travin ličyć, što pry stvareńni takoj dziaržavy asimilavać biełarusaŭ i pazbaŭlać ich usich atrybutaŭ niezaležnaści nieabaviazkova — možna stvaryć niejkuju kanfiederacyju, u jakoj Łukašenka zachavaje svaju pasadu. Meta ŭ hetym pytańni važniejšaja za kaštoŭnaści.
«Havorka ž idzie nie ab farmiravańni impieryi epochi madernu, dzie daminujučaja nacyja mahła imknucca da asimilacyi małych narodaŭ, a ab kanstrukcyi epochi postmadernu, u jakoj zusim roznyja kaštoŭnaści mohuć suisnavać dziela vykanańnia hałoŭnaj zadačy — stvareńnia pasady, na jakoj Pucin pry zachavańni litary (ale nie duchu) zakona i pry ŭsieahulnaj padtrymcy moža znachodzicca, kolki pažadaje »,
— piša Travin.
Kommiersant: Minsk vyrašyŭ vyžyvać samastojna i Maskvie nie sastupać
Palityčny ahladalnik «Kommiersanta» Dźmitryj Dryzie ličyć, što Minsk vyrašyŭ vyžyvać samastojna i Maskvie nie sastupać.
Miarkujučy pa ŭsim, šancaŭ damovicca z Pucinym 25 śniežnia ŭ čas apošniaj u 2018 hodzie asabistaj sustrečy ŭ Łukašenki vielmi mała, piša Dryzie. U Biełarusi sprabujuć niešta prydumać, jak pražyć biez tannaj rasijskaj nafty i hazu. Chodziać čutki pra zvarot pa dapamohu da Zachadu, jakaja, praŭda, małaimaviernaja.
Tak što pakul adzinaje, što prahladajecca, heta tužej zaciahnuć pajasy, upeŭnieny kałumnist «Kommiersanta».
«Dla Łukašenki niezaležnaść — heta ŭžo zusim krajni vypadak — apošni rubiež. Choć tak byvaje, što samyja nieprystupnyja krepaści prychodzicca zdavać. Asabliva, kali niama inšaha vyjścia»,
— piša rasijski žurnalist.
