Vajenny kamisar Słuckaha i Staradarožskaha rajonaŭ Alaksandr Pietraviec pakinuŭ svaju pasadu. Pryčyna banalnaja — na jaho zaviali kryminalnuju spravu za chabar.
Pa niepaćvierdžanaj infarmacyi, Pietraviec braŭ hrošy za dapamohu pryzyŭnikam paźbiehnuć słužby ŭ vojsku ci atrymać adterminoŭku.
Chodziać čutki, što razam ź im byŭ zatrymany jašče adzin supracoŭnik vajenkamata.
U vajenkamacie kažuć tolki: «Pietraviec u nas bolš nie pracuje, ciapier pasadu načalnika zajmaje Ihar Hal».
«Naša Niva» źviazałasia z žonkaj Pietraŭca. Pavodle jaje słovaŭ, muž ciapier doma. Pra kryminalnuju spravu žančyna havaryć admoviłasia.
Ale ŭ Śledčym kamitecie «Našaj Nivie» paćvierdzili — Pietraviec pad vartaj.
«Upraŭleńniem Śledčaha kamiteta pa Minskaj vobłaści rasśledujecca kryminalnaja sprava ŭ dačynieńni da byłoha vajennaha kamisara Słuckaha i Staradarožskaha rajonaŭ. Kryminalnaja sprava raspačata prakuraturaj Minskaj vobłaści pa prykmietach złačynstva, praduhledžanaha č. 3 art. 430 Kryminalnaha kodeksa Respubliki Biełaruś (atrymańnie chabaru asobaj, jakaja zajmaje adkaznuju pasadu). U ciapierašni čas mužčynu pradjaŭlenaje abvinavačvańnie, z sankcyi prakurora da jaho ŭžytaja miera strymańnia ŭ vyhladzie zaklučeńnia pad vartu. Pa kryminalnaj spravie pravodziacca śledčyja dziejańni i apieratyŭnyja mierapryjemstvy, nakiravanyja na ŭstalavańnie ŭsich abstavinaŭ supraćpraŭnaj dziejnaści», - raspaviała Taćciana Biełanoh, aficyjny pradstaŭnik SK pa Minskaj vobłaści.
48-hadovy Pietraviec zajmaŭ svaju pasadu z 2013 hoda. Letaś jon staŭ deputatam Słuckaha rajonnaha savieta. Kamisii publikavali infarmacyju pra dachod kandydataŭ. Zhodna ź imi, Pietraviec zarablaŭ trochi bolš za 1400 rubloŭ na miesiac.
Ciapier Alaksandru Pietraŭcu pahražaje da 15 hadoŭ.