Žycharka Baranavičaŭ Iryna nienaŭmysna začapiła plašku piva ŭ handlovym centry, i taja raźbiłasia. Mahazin patrabuje pakryć uron, a žančyna ŭpeŭnienaja, što hrošy ź jaje sprabujuć atrymać niezakonna: ni namieru sapsavać majomaść, ni jaje viny ŭ tym, što zdaryłasia, niama.
Fota: Intex-press
Iryna raspaviadaje, što ŭviečary 29 śniežnia, kali jana vybirała ŭ handlovym centry sok, pa nieaściarožnaści začapiła plašku piva.
— Ja zrabiła krok nazad ad stełaža z sokami, kab lepš razhledzieć tavar. A zzadu stajaŭ rekłamny kub ź pivam, i adna plaška z hetaj kanstrukcyi ŭpała i raźbiłasia. Ja navat nie zrazumieła, jak heta adbyłosia, — raspaviadaje žančyna.
Kali Iryna padyšła da kasy, kab raźličycca za tort i sok, da jaje padyšoŭ pradstaŭnik słužby achovy i zapatrabavaŭ zapłacić za pabituju plašku piva — 1,74 rubla.
— Ja navat padumać nie mahła, što da mianie buduć niejkija pretenzii, tamu što viny majoj u tym, što hetaja plaška zvaliłasia, niama. Pa-pieršaje, ja nienaŭmysna jaje začapiła, a pa-druhoje, butelki byli vystaŭlenyja niaŭstojliva, nijak nie aharodžanyja. Tolki na hetych raźbitych plaškach krama moža zrabić biznes, — kaža žančyna.
Kub ź pivam, ź jakoha ŭpała plaška, fota pakupnicy
Płacić za raźbituju plašku ź pivam Iryna admoviłasia. Tady jaje paprasili prajści ŭ kabiniet achovy handlovaha centra, dzie jana praviała cełuju hadzinu.
U pačatku studzienia Iryna atrymała piśmovuju pretenziju z handlovaha centra z prośbaj apłacić canu paškodžanaha tavaru.
9 studzienia Iryna jašče raz pasprabavała ŭrehulavać pytańnie z administracyjaj handlovaha centra, ale ničoha nie damahłasia.
— Dovadaŭ, što majoj viny ŭ tym, što adbyłosia, niama, supracoŭniki centra i słuchać nie žadali. Ich pazicyja takaja: ci apłačvajcie, ci my padadzim ŭ sud, i płacić vam usio adno pryjdziecca, tolki našmat bolš, — raspaviadaje Iryna.
Ad padrabiaznych kamientaroŭ u handlovym centry admovilisia.
Apłačvać uron kramie Iryna nie źbirajecca.