Makiedonskija parłamientaryi adobryli ŭniasieńnie papravak u Kanstytucyju, jakimi praduhledžana źmianieńnie nazvy krainy z Respubliki Makiedonija na Respubliku Paŭnočnaja Makiedonija. Papraŭki padtrymaŭ 81 deputat ci dźvie traciny ad ahulnaj kolkaści parłamientaryjaŭ.
Papraŭki praduhledžvajuć źmianieńnie nazvy krainy na «Paŭnočnuju Makiedoniju», a taksama zamacoŭvajuć adsutnaść pretenzij da suvierenitetu i terytoryi susiednich dziaržaŭ, praduhledžvajuć zachavańnie identyčnaści makiedonskaha naroda i abaviazki dziaržavy pa padtrymcy dyjaspary.
Adpaviednyja źmieny byli zaćvierdžany ŭ pahadnieńni z Hrecyjaj, što adkryvaje pierad krainaj šlach u NATA i ES. U pryvatnaści, u NATA miarkujuć, što paŭnavartasnaje siabroŭstva ŭ Aljansie Paŭnočnaja Makiedonija moža atrymać užo viasnoj hetaha hoda.
Situacyja vakoł nazvy hetaj byłoj juhasłaŭskaj respubliki pieraškadžała zbližeńniu Makiedonii ź Jeŭrasajuzam i NATA, pakolki suprać nazvy Respublika Makiedonija vystupała Hrecyja, adna z abłaściej jakoj taksama nazyvajecca Makiedonijaj. Paśla raspadu Sacyjalistyčnaj Fiederatyŭnaj Respubliki Juhasłavija Makiedonija była pryniata ŭ AAN pad nazvaj Byłaja juhasłaŭskaja respublika Makiedonija, a na hrečaskich kartach jana nazyvałasia Skopija — pa naźvie stalicy krainy Skopje.
