12 studzienia adbyŭsia Sojm Partyi BNF, pa vynikach jakoha była pryniataja zajava.
Partyja BNF kanstatuje, što pakul isnuje «sajuznaja dziaržava» — isnuje pahroza anšlusu, likvidacyi biełaruskaj dziaržavy i jaje inkarparacyi ŭ skład Rasii.
Razam z tym Respublika Biełaruś jość formaj isnavańnia biełaruskaj nacyi — i tolki jak biełaruskaja nacyjanalnaja dziaržava jana maje sens dla isnavańnia i moža pretendavać na ustojlivaść. Dziaržaŭnyja instytuty buduć sapraŭdy mocnyja tolki tady, kali buduć abapiracca na biełaruskaje hramadztva, biełaruski biznes, biełaruskaje sialanstva, biełaruskaje vojska, biełaruskija ŚMI, biełaruskuju carkvu, na pačućcio našaj ahulnaj identyčnaści jak biełarusaŭ i pačućcio našaj supolnaj adkaznaści za los našaj krainy i budučych pakaleńniaŭ biełarusaŭ.
U hetaj systemie dziaržavaŭtvaralnych padmurkaŭ najvažniejšym elementam źjaŭlajecca biełaruskaja mova. Vybar na karyść biełaruskaj movy — heta vybar na karyść nacyjanalnaj dziaržavy i, u rešcie rešt, adzina mahčymy vybar dla sapraŭdnaha biełaruskaha patryjota.
Pakul značnaja častka biełarusaŭ nie karystajecca biełaruskaj movaj, hladzić rasiejskija telekanały, žyvie ŭ rasiejskaj moŭnaj prastory — zaŭždy budzie niebiaśpieka taho, što siudy pryjduć rasiejskija tanki «baranić ruskamoŭnych». Niezdarma ž rasiejskija šavinisty kažuć što «russkij mir» — heta ŭsia prastora panavańnia rasiejskaj movy.
Prymajučy pad uvahu aktyvizacyju antybiełaruskich vystupaŭ i infarmacyjnych atak suprać Biełarusi i biełarusaŭ, my abviaščajem 2019 hod hodam biełaruskaj movy i zaklikajem da nastupnych krokaŭ pa ŭmacavańni biełaruskaj movy:
- Zaklikajem usich žycharoŭ Biełarusi vyvučać i ŭdaskanalvać stupień vałodańnia biełaruskaj movaj, zaklikajem karystacca biełaruskaj movaj va ŭsich žyćciovych vypadkach, inicyjavać stvareńnie biełaruskamoŭnych hrupaŭ i płyniaŭ u navučalnych ustanovach roznych uzroŭniaŭ;
- Zaklikajem usich biełarusaŭ padčas pierapisu nasielnictva, jaki pryznačany na kastryčnik 2019 hoda, paznačać biełaruskuju movu ŭ jakaści rodnaj movy i movy štodzionnaha ŭžytku doma;
— Zaklikajem biełaruski biznes, usich vytvorcaŭ tavaraŭ i pasłuhaŭ, karystacca biełaruskaj movaj u reklamnych kampanijach, u azdableńni tavaraŭ, u kamunikacyi z pakupnikami i karystalnikami;
— Patrabujem ad uładaŭ Biełarusi abmiežavać tranślacyju rasiejskich telekanałaŭ, jakija raspalvajuć mižnacyjanalnuju varažnieču i pa-sutnaści jość srodkami viadzieńnia infarmacyjnaj vajny suprać našaj krainy, zamianiŭšy ich prahramami ŭłasnaj vytvorčaści albo zbałansavanym naboram zamiežnych teleprahramaŭ z roznych inšych krainaŭ;
— Patrabujem ad uładaŭ Biełarusi pryniaćcia aktaŭ zakanadaŭstva na biełaruskaj movie;
— Zaklikajem ułady Biełarusi pašyrać vykarystańnie biełaruskaj movy ŭ systemie adukacyi, u tym liku stvaryŭšy vyšejšyja navučalnyja ustanovy z vykładańniem na biełaruskaj movie i pryniaŭšy na zakanadaŭčym uzroŭni dziaržaŭnuju prahramu raźvićcia i padtrymki biełaruskamoŭnaha navučańnia z pavieličeńniem dziaržaŭnaha finansavańnia prahramaŭ pa raźvićci biełaruskaj kultury, adukacyi i movy z vydzialeńniem srodkaŭ na konkursnaj asnovie niedziaržaŭnym inicyjatyvam i arhanizacyjam hramadzianskaj supolnaści, havorycca ŭ zajavie
