«Dobry dzień! U mianie pytańnie: moj muž adbyvaje pakarańnie na terytoryi Biełarusi. Ja chacieła b jaho zastrachavać ad niaščasnych vypadkaŭ. Padrabiaznuju infarmacyju ŭ internecie nie znajšła. Moža vy padkažacie, jakaja kampanija na terytoryi Biełarusi moža zaklučyć damovu ź viaźniem?», — napisała jana ŭ liście.
fota Tut.by
Pravaabaroncy vyrašyli razabracca ŭ hetaj prablemie. Bo sapraŭdy, hramadzianie, jakija adbyvajuć pakarańnie va ŭstanovach pienitencyjarnaj sistemy, znachodziacca ŭ zonie padvyšanaj ryzyki, i było b słušna, kali b ich žyćcio mahčyma było b zastrachavać ad mahčymych niaščasnych vypadkaŭ.
Akazałasia, što nie ŭsio z pytańniem strachavańnia źniavolenych tak prosta.
Jašče ŭ 2014 hodzie pravaabaronca ź Viciebsku Leanid Śviecik źviartaŭsia ŭ Pałatu pradstaŭnikoŭ z prapanovaj raspracavać i zakanadaŭča zamacavać prava źniavolenych na strachavańnie ad niaščasnych vypadkaŭ. Deputaty pieranakiravali jaho prapanovu ŭ Departamient vykanańnia pakarańniaŭ, i adtul pravaabaroncu pryjšoŭ adkaz, što ŭ takim zamacavańni niama nieabchodnaści, bo ŭ dziejučym zakanadaŭstvie hetaje pytańnie vyrašana ŭ poŭnym abjomie.
I sapraŭdy, farmalnaje prava na dobraachvotnaje strachavańnie ŭ źniavolenych i asudžanych majecca. Strachavyja kampanii majuć mahčymaść akazvać strachavyja pasłuhi ŭ miescach utrymańnia źniavolenych, samastojna vyznačajučy ŭmovy strachavańnia i vidy pasłuh.
Ale ci tak jano na samoj spravie? Pravaabaroncy vyrašyli abtelefanavać biełaruskija strachavyja kampanii i naŭprost spytać u kansultantaŭ pra toje, ci moža ŭ ich zastrachavacca źniavoleny. Pradstaŭnikam usich strachavych kampanij było ahučana nastupnaje pytańnie: «Ci moža vaša kampanija zastrachavać zdaroŭje/žyćcio majho muža, jaki znachodzicca ŭ miescach pazbaŭleńnia voli na terytoryi Biełarusi?»
I voś jakija adkazy my atrymali.
«U ciapierašni čas «Biełdziaržstrach», zychodziačy z pryncypu svabody damovy dobraachvotnaha strachavańnia, ustanoŭlenaha punktam 1 artykuła 391 Hramadzianskaha kodeksa Respubliki Biełaruś, nie ažyćciaŭlaje strachavańnie źniavolenych (asudžanych) hramadzian. Heta źviazana z začynienaściu ustanoŭ, dzie znachodziacca źniavolenyja, što abciažarvaje atrymańnie strachoŭščykam dakumientaŭ dla vyrašeńnia pytańnia ab strachavoj vypłacie: vynikaŭ miedycynskich ahladaŭ, prakurorskich pravierak, rašeńniaŭ ab raspačynańni kryminalnych spraŭ, pastanoŭ sudoŭ, dakumientaŭ ad śledčych, daznaŭcaŭ, jakija paćviardžajuć fakt naniasieńnia pabojaŭ. Infarmacyjaj ab tym, jakija strachavyja kampanii ažyćciaŭlajuć strachavańnie źniavolenych (asudžanych) hramadzian Biełdziaržstrach nie maje», — paviedamiła viadučy śpiecyjalist adździeła mietadałohii kiravańnia miedycynskaha strachavańnia Anastasija Sidoryk.
Kansultant kampanija «Biełrosstrach» adrazu skazała «Nie», tolki pačuŭšy pytańnie. U nastupnaj strachavoj kampanii «Kupała» adkazali, što nie strachujuć žyćcio i zdaroŭje tych, chto znachodzicca na terytoryi Biełarusi, to bok ich strachoŭka dziejničaje tolki pa-za miežami krainy. Cikava, ale ź infarmacyi, źmieščanaj na sajcie kampanii, heta nijak nie vynikaje.
U kampanijach «BiełVEBstrachavańnie» i «Biełkaapstrach» taksama admovilisia strachavać žyćcio źniavolenaha. U kampanii «Indziaržstrach» na zadadzienaje pytańnie adkazali, što na dadzieny momant jany nie strachujuć fizičnych asobaŭ. A ŭ strachavoj kampanii «Task» na sajcie źmieščana infarmacyja, što damovy strachavańnia ad niaščasnych vypadkaŭ nie składajucca ŭ dačynieńni da asobaŭ, jakija znachodziacca pad śledstvam abo asudžanych da pazbaŭleńnia voli. Darečy, heta adzinaja strachavaja kampanija, sajt jakoj utrymlivaŭ takuju infarmacyju.
Ale ŭ vyniku ŭsio ž znajšłasia adna strachavaja kampanija, jakaja pahadziłasia zastrachavać źniavolenaha ad niaščasnych vypadkaŭ. Heta kampanija «Biełnaftastrach». Paśla niekalkich chvilin uzhadnieńnia dziaŭčyna-kansultant adkazała, što zabaronaŭ na takija pasłuhi ŭ zakanadaŭstvie niama i tamu strachavańnie mahčyma. Dla hetaha jana prapanavała svajaku (u dadzienym vypadku žoncy) pryjści ŭ ofis kampanii sa svaim pašpartam i z kopijaj pašpartu źniavolenaha.
Dadatkova pravaabaroncy nakiravali elektronnaje piśmo pa pytańni strachavańnia źniavolenych u Biełaruskuju asacyjacyju strachoŭščykaŭ, adnak nijakaha adkazu dahetul nie atrymali.
Z atrymanaj infarmacyi vynikaje, što strachavyja kampanii ŭ svajoj bolšaści sami nie zacikaŭlenyja ŭ akazańni takoha vidu pasłuh, pakolki im heta niavyhadna ekanamična i praduhledžvaje šmat ryzyki.
Hałoŭnaja pryčyna takoha staŭleńnia palahaje chutčej za ŭsio ŭ zakrytaści pienitencyjarnaj sitemy, u suviazi z čym pry nastupleńni strachavoha vypadku bolš składana aformić nieabchodnyja dakumienty, vyśvietlić abstaviny zdareńnia, atrymać miedyčnaje zaklučeńnie, vykanać inšyja, nieabchodnyja ŭ takim vypadku pracedury.
Ale ž, naprykład u Rasii možna naličyć dziesiatki kampanij, jakija takija pasłuhi akazvajuć, a tamu majuć vopyt pracy va ŭmovach pienitencyjarnych ustanoŭ. Chiba ciažka skarystacca ich napracoŭkami?
Na dumku jurysta Pravaabarončaha centra «Viasna» Paŭła Sapiełki, najaŭnaść u asudžanaha strachavoha polisu ab dabraachvotnym strachavańni zdaroŭja abo ad niaščasnaha vypadku mahło b palepšyć umovy pracy źniavolenych, uzmacniła pracoŭnuju dyscyplinu i palepšyła stasunki supracoŭnikaŭ Departamienta vykanańnia pakarańnia z asudžanymi hramadzianami.
