Śviatłana Druk (pazyŭny «Vietryk»), jakaja vajavała na baku tak zvanaj «Danieckaj narodnaj respubliki» («DNR»), pakinuła hetuju terytoryju i pierajšła na bok Ukrainy. Pra heta havorycca ŭ siužecie ŭkrainskaha telekanała «1+1».
Druk była kamandziram žanočaha tankavaha ekipaža. Svaje siužety całkam žanočamu ekipažu tanka pryśviačali taksama telekanał Life i prahrama «Viesti niedieli» na telekanale «Rasija 1».
Samaabvieščanuju respubliku «Vietryk» pakinuła niekalki miesiacaŭ tamu, paśla čaho niekalki miesiacaŭ pierakonvała svajo kiraŭnictva, što znachodzicca ŭ Rasii, dzie nibyta prachodzić lačeńnie ŭ balnicy. Paśla taho jak jaje dzieci byli vyviezieny na terytoryju, jakuju kantraluje Ukraina, žančyna raspaviała pra svaju historyju žurnalistam.
Pryčynaj pierachodu Druk na bok Ukrainy ŭ siužecie nazvany niejki «asabisty matyŭ». «Ja maju tut, spadziajusia, siabra, jaki mnie našmat bližejšy ciapier. Tak, [jon supracoŭnik śpiecsłužby]», — patłumačyła jana.
Druk taksama zajaviła, što hatovaja śviedčyć ab złačynstvach Rasii na Danbasie, a taksama znoŭ brać udzieł u kanflikcie, ale z boku Ukrainy.
«Deputat Narodnaha savieta DNR» Uładzisłaŭ Bryh paćvierdziŭ RBK, što Śviatłana Druk pakinuła «respubliku» i pierajšła na bok Ukrainy. Pry hetym jon ukazaŭ, što Druk «nie na słužbie z 2017 hoda».
