U siryjskaj pravincyi Dejr-ez-Zor rasijskija vajskoŭcy trapili ŭ zasadu bajevikoŭ. Pra heta paviedamlaje Bi-bi-si.
Svajak adnaho z aficeraŭ raspavioŭ vydańniu, što 22 lutaha aŭtamabil UAZ, u jakim znachodzilisia rasijskija vajskoŭcy, trapiŭ u zasadu bajevikoŭ pablizu horada Al-Majadzin. U mašynie znachodzilisia major i dva pałkoŭniki. Jak adznačajecca, Ministerstva abarony Rasii ab ich hibieli aficyjna nie paviedamlała.
Suchrob Karymaŭ vučyŭsia na vajskovaha jurysta. Fota z VK.COM
Baćkam adnaho ź ich — majora Suchroba Karymava — paviedamili pra toje, što adbyłosia, i paprasili ŭ vajennym špitali imia Burdenki zdać analiz DNK. Adnak pa vynikach testu ŭzory nie supali.
35-hadovy Karymaŭ słužyŭ u 38-j hvardziejskaj motastrałkovaj bryhadzie, pastajannaje miesca dysłakacyi jakoj — siało Jekaciarynasłaŭka Amurskaj vobłaści. Štatnaja pasada — kamandzir bataljona. U svaju ŭžo druhuju pa liku kamandziroŭku ŭ Siryju major Karymaŭ adpraviŭsia letam 2018 hoda. Jon dobra viedaŭ arabskuju movu i moh pracavać na miescy pierakładčykam. U kamandziroŭcy jon prabyŭ «ci to vosiem, ci to dzieviać miesiacaŭ», raspavioŭ Bi-bi-si adzin ź jaho svajakoŭ, jaki pažadaŭ zastacca ananimnym.
«Chutka miesiac budzie, jak jon [Karymaŭ] prapaŭ bieź viestak», — dadaŭ surazmoŭca.
Vydańniu nie ŭdałosia vyśvietlić imiony astatnich vajskoŭcaŭ, jakija znachodzilisia va UAZie. Na adpraŭleny ŭ Minabarony zapyt adkazu niama.
Ministerstva abarony Rasii nie ŭ pieršy raz zamoŭčvaje pra straty siarod rasijskich vajskoŭcaŭ na terytoryi Siryi. U studzieni Bi-bi-si raspaviadała pra hibiel aficera sił śpiecyjalnych apieracyj Maksima Platniova i vajskoŭca 21-j hvardziejskaj motastrałkovaj bryhady Andranika Arustamiana. Abaronnaje viedamstva nijak nie kamientuje hetyja straty.